ТАЧЕ ЯЛЫШТЕ

Тагына пуш

  Оршанке район Тошто Крешын ялыште илыше кидмастар-влак В.Кудрявцев ден Н.Кузнецов тагына пушым ыштеныт. Ты пашам кузе тӱҥалмышт нерген каласкалаш йодым.

— Шуко кидмастарын пашаже мондалт толеш. Нуно тӱня гыч каят, а сомылыштым шуйышыжо уке манаш лиеш. Пашаштым арален кодаш манын, ме Николай Кузнецов дене кутырен келшенна. Крешын кундемыште  пытартыш гана пушым 2001 ийыште ыштыме. Тагына пушым ышташ семинарымат эртараш шонымаш лийын, но самырык-влак ушнаш вашкен огытыл, лач ӧрдыж гыч ончалын, эртен веле каеныт. Тыге тагына пушым шке кидна денак шочыктенна, — мане В.Кудрявцев.

  Виталий Кудрявцев ден Николай Кузнецов икмыняр кече шкак товар дене руэн шогылтыныт, лачак  пушым тулото ӱмбалне кошташ сакаш еҥ-влакым ӱжыныт. Тагына пушым верысе кидмастар  Василий Трофимович Макаровын ыштен кодымо образецше почеш ыштеныт.

— Пушеҥге кӧргым эрыкташ, пушым ышташ торештоварым, карым, ковым кучылтынна. Ик торештоварже кугезе кочам дечак кодын, весыжым апшат  тыглай товар гыч ыштен  савырен пуэн, — мутланымашке ушныш Николай Васильевич.

Кидмастар-влак калыклан, у тукымлан тагына пушым кузе ышташ кӱлмӧ нерген  документальный фильмымат войзеныт. Ты кино Экологий идалыклан пеш келшен толеш.

15 июльышто ты кундемыште «Эҥер вӱд»  муро фестиваль эрта. Сандене В.Кудрявцев ден Н.Кузнецов кызытак  Ошла серым эрыкташ да сӧрастараш тӱҥалыныт. Варажым кидмастар-влак Ошла эҥер серым, верысе кум памашым, тошто вӱдвакшыш корным, вӱдуа плантацийыштым ончыктен коштыктышт.

 Чынжымак тыгай уста еҥ-влакын пашаштым ончен, чон куана. Нуно акрет сомыллан йомаш огыт пу, садлан тӱҥалме суапле пашашкышт самырык-влакым ушаш йӧнышт лийже манын тыланыме шуэш.

М.СКОБЕЛЕВ.

Авторын фотожо.

Снимкыште: 6661- Н.Кузнецов ден В.Кудрявцев тагына пушыштым ончыктат.

Опубликовать в Одноклассники

Добавить комментарий