Шукерте огыл республикысе татар тӱвыра рӱдерыште эртыше «Сылукай-2019» конкурсышто эн мотор татар ӱдырым ойыреныт.
Тиде титулым Юл кундем технологий кугыжаныш университетын студенткыже, Параньга район гыч Айгуль Рахимова сеҥен налын. Ӱдыр-влаклан шке нерген палдараш, национальный вургемым ончыкташ, азам малтыме мурым йоҥгалтараш, тыгак татар кочкышым палаш да «мӧҥгысо лапша» блюдом ямдылаш кӱлын. Уш-акыл пӱсылыкыштымат жюри аклен.
Тӱҥ сеҥыше деч посна номинацийлаштат ойыртемалтше-влакым палемденыт. Ынде Марий Элын эн мотор татар ӱдыржӧ тыгаяк тӱнямбал кӱкшытан конкурсыш кая. Тудо Ижевскыште эртышаш.
С.НОСОВА.
Снимкыште: сеҥышыш лекше татар ӱдыр-влак.
Фотом Татар тӱвыра рӱдерын сайтше гыч налме.
