УВЕР ЙОГЫН

Суртым да чоным ырыкта

Эртыше кушкыжмын Марий Эл вуйлатыше Александр Евстифеев Шернур район Кукнур селаште газым чӱктымӧ церемонийыште лийын.

Кукнур ял шотан илем ик эн мӱндырнӧ, Киров область дене чекыште, верланен.  Йошкар-Ола гыч тусо эн тора ялышкыже 160 утла километр погына. Районышто индеш ола да ял шотан илем гыч лач Кукнур кундемыште гына газификаций лийын огыл.  Канде тул чылаже 17 ялыш (тушто чылаже 2,500 еҥ ила) мийышаш. Ончыкыжым тушто  кум муниципальный котельныйым пӱртӱс газыш кусарынешт. Нуно кок клубым, йочасадым ырыктышаш улыт. Тылеч посна  шуко пачеран пӧртым да социальный назначениян объектым ырыктыше шӱй дене олтыман кок котельныйымат алмашташ палемдыме. А тений У ий марте газым куд ялыште (Кукнур, Чисола, Аптулят, Аҥанур, Купсола, Меке) пуртен шуктышаш улыт. Пытартыш  кумытыштыжо южо суртыш кызытак газым чӱктымӧ. Кукнурыштыжо гын Ямакай уремыште илыше-влак чулымрак лийыныт. Лач нунын дене икымше газ тул чӱкталтын. Молыштлан документым, газ службын йодмашыжым веле писынрак шукташ кодын. 

– Таче моткоч кугу пайрем. Ме посёлко кокласе кугу давлениян газ пучым Кукнур ял шотан илемысе куд ялышке  пашаш колтена. Республикыште газификацийын кӱкшытшӧ кугу. Кокла налмаште 86 процент. А теве таче кече гыч Шернур районышто тиде кӱкшыт 94 процентыш шуын. Тиде моткоч сай показатель, – палемден А.Евстифеев.

Кукнурышто газым пашаш колтымым ме шке шинча денак ужна. Селасе ФАП воктене калык ятыр погынен ыле. Эсогыл верысе кыдылаш школ гыч тунемше-влак лийыныт. Чынже денак кугу пайрем семын аклыман. Калык коклаште теве мом колаш логале. Ты кундемыште республик вуйлатыше -влак кокла гыч пытартыш гана 18 ий ончыч толын.

Александр Евстифеев Марий Элыште  газификаций пашам умбакыжат шуйымым палемден, молан манаш гын газ производствым,экономикым вияҥдаш йӧным ышта, селасе калыкынат илышыштым куштылемда. Марий Эл вуйлатыше газпучым шупшшо, ты отрасльыште тыршыше-влаклан кӱчык жапыште пашам шуктымыштлан таум каласен. А Кукнур кундемыште илыше-шамычлан  «канде тул» суртышт ден чоныштым ырыктыже манын тыланен.

«Газпром межрегионгаз Йошкар-Ола» ден «Газпром газораспределений Йошкар-Ола» ООО-влакын генеральный директоржо А.Еремин газпучым  жапыштыже шупшын шукташ Марий Эл правительствын, Шернур район администрацийын, Кукнур кундемыште илыше калыкын пырля умылен пашам ыштымышт полшен манын каласен. 

– Тиде объектым шукташ куштылго лийын огыл, молан манаш гын кӱчык жапыште тынар кужу корным эртыман ыле. Чыным каласем, мый шкежат Кукнурыш газ толын шуэш манын ӱшанен омыл. Но таче чыланнамат тиде куанле тат дене саламлем. Кеҥеж жапыште 60 километр газ пучым шупшмо. Тиде кумдыкым йолынат каяш манаш веле, а тыште  кӱнчаш, пучым мландыш пышташ кӱлын… Санденак ты пашам ыштыше-влаклан вуйым савем, республикын правительствыжланат тауштем. Ынде кокымшо ий ме келшен, ваш умылен пашам ыштена, – каласен А.Еремин.

Тауштымо мутым Шернур район администрацийым вуйлатыше С.Адигановат ойлен. Кукнур ял шотан илемысе депутат-влак погынымашын депутатше Л.Алмаматоват чон почын тауштен.

Республик вуйлатыше газ факелым  чӱктен да Кукнур селан ик эн пагалыме еҥжын, Кугу Отечественный сарын ветеранже Никандр Алексеевич Конаковын, суртышкыжо унала пурен. Александр Евстифеев ветераным саламлен да Марий Эл правительстве да «Газпром» лӱм дене газ плитан  паспортшым кучыктен. Никандр Алексеевич тауштен да уна-влакым ӱстелтӧрыш чай дене мелнам тамлаш ӱжын.

Сийлалтме жапыште шоҥгыеҥ шкеж нерген каласкален. Германий да Японий дене сар-влакым эртен. Сар деч вара шочмо кундемжым тӱзатымаште пашам ыштен. Сельсоветыште бухгалтерлан, счетоводлан, экономистлан тыршен. Вич шочшыжо, 24 уныкаж ден уныкажын икшывыже-влак улыт. Шушаш ийын 6 февральыште ветеран 93 ийжым палемдаш тӱҥалеш.

Л.ШАБДАРОВА.

Д.Речкинын фотожо.

Опубликовать в Одноклассники

Добавить комментарий