Пенсий законодательствыште пенсийым жап деч ончыч палемдыме шотышто у условий-влак лектыныт. 2019 ий 1 январь гыч кугу стаж сулен налме канышыш закон дене палемдыме ийгот деч ончыч лекташ у негыз лийын.
Тудын дене келшышын, 37 ий деч шагал огыл паша стажан, 55 ий деч изи огыл ийготан ӱдырамаш-влак пенсийыш 2 ийлан ондак лектын кертыт. 60 ий деч изи огыл ийготан пӧръеҥ-шамычлан пенсийыш жап деч ончыч лекташышт 42 ий паша стаж кӱлеш.
Тыгай сынан пенсийым страховой стажым шотыш налын палемдат. Страховой огыл жап – армийысе службо, икшывым ончымо шотышто отпуск, пашадымылык шотышто пособийым налме да 80 ийым темыше гражданиным ончымо пагыт – стажыш огыт пурталт.
Тымарте аклыме почеш, Марий Элыште 392 еҥ пенсийыш ончылгоч лекташ лийме наре паша стажым поген, ты чот гыч 127 гражданинже тиде права дене тенияк пайдаланен кертеш. Тений икымше кварталыште кугу паша стажан 53 еҥлан пенсийым жап деч ончыч палемдыме.
Ушештарена, шке паша стажым, пашам пуышын страховой взносым тӱлымыжым, баллым Россий Пенсий фондын сайтыштыже личный кабинетыште тергыман. Тидым мобильный приложений але Пенсий фондын клиент службыжо полшымо дене ыштыман.
М.ИВАНОВА
