Йошкар-Олан ончычсо мэрже Павел Плотниковын делаже шотышто колыштмаш умбакыже шуйна. Кодшо кечылаште икмыняр заседаний лийын.
Ушештарена: тудо предприниматель пашам закондымын шуктымылан да взятке шотеш кум гаражым налмылан титаклалтеш.
Титаклымаште утларакше тӱҥ свидетельын – предприниматель Александр Туруевын — показанийжылан эҥертат. Павел Плотниковым пушташ тӧчымыжлан кызыт тудо колонийыште шинча. Судышто Туруевым эше йодыштын огытыл. Заседанийлашке ончычсо мэрын подчиненныйжо, пошкудыжо-влакым, А.Туруевын компанийлаштыже пашам ыштыше-шамычым ӱжыктат. Тиде делам ончымаште обвиненийын 120 свидетельже гыч але марте пелыже наре показанийым пуэныт.
Вес заседанийлаште свидетель-влак деч Туруевын фирмыже-влаклан пӧртым чоҥаш мланде участке кузе ойырталтме, аукцион кузе эртаралтме, моло нерген йодыштыныт. Тыгак «Парус» проект организацийын директоржо Александр Суворов кугыжаныш обвинитель-влакын предприниматель Александр Туруевын (тудо «РУК» ден «Столица-Строй» компаний-влакын учредительже ден вуйлатышыже. Плотников нине организаций-влакым вуйлатымашке закон дене келшыдымын ушнымыжлан титаклалтеш – авт.) йодмыж почеш проектым ямдылымыж нерген йодышыштлан вашештен.
А, мутлан, «Столица-Строй» компанийын ончычсо снабженецше Ильдар Хафизов кугыжаныш обвинитель-влакын Плотниковын ватыжын могайрак улмыжым кушеч палымыж нерген йодмыштлан вашештен:
— СМИ гоч але … Кунам мемнан деке бухгалтерийыш пурен лектеда ыле, тунам тудым пален омыл. А кызыт палем. «Столица-Стройыш» тудо жапын-жапын толеден. (Ончычсо заседанийлаште свидетель-шамыч Александр Туруевын компанийже-влаклан ала-могай консультационно-аудиторский услугым пуымыж нерген ойленыт. Кок организацийжынат окса дене кылдалтше пашашт кузе кайыме нерген тудо пален манын палемдат – авт.)
Но Оксана Плотникован фотокартычкыжым нимогай СМИ-штат ончыктен огытыл. Мут денат возен огытыл. Тугеже …
Л.Камалетдинова.
