УВЕР ЙОГЫН

Суд зал гыч:  Марий Элын ончычсо спорт министрым эрык деч посна 2 ийлан условно коденыт

Йошкар-Оласе суд Марий Элын ончычсо спорт  министрже Сергей  Кивериным титаканлан шотлен да эрык деч посна 2 ийлан условно кодаш пунчалын. 

27 апрельыште суд тудын шотышто тарватыме уголовный делам ончен пытарен да 3 ий испытательный срок дене эрык деч посна условно 2 ийлан кодымо дене пырля эше кок ий да 6 тылзе жапыште икмыняр тӱрлӧ должностьышто пашам ышташ чарен.

«Марий Элын спорт оралтыже-влак управлений» автономный учрежденийын ончычсо директоржо Александр Лежнинымат суд титаканлан шотлен да 30 тӱжем теҥге штрафым тӱлыкташ палемден.

Ушештарена: следствийын шонымыж почеш, Киверин ден Лежнин автономный учрежденийыш инструктор должностьыш «Спартак» ФК-н членже-влакым пашаш фиктивно налыныт. Тыге нунылан пашадар да ешартыш выплате семын 5 051 653,45 теҥге тӱлалтын.

Кызытеш тиде пунчал илышыш пурен огыл да тудым обжалователн кертыт.

Л.Камалетдинова.

Опубликовать в Одноклассники

Добавить комментарий