Йошкар-Оласе историй тоштер пелен ыштыше Турист-увер рӱдер «Твой сувенир — YOur souvenir» проектым илышыш шыҥдараш пижын.
Ты проект дене тудо Марий Эл Республик вуйлатышын республикыш толын коштмо да республике деч ӧрдыжкӧ лектын коштмо туризм сферыште увертарыме грантым сеҥен налын. Регионыш толын коштшо турист-влакын мемнан кундемна нерген сайрак шарнымашышт кодшо манын, лӱмын олан, республикын символикышт дене кылдалтше сувенир-влакым ямдылат. Тиде ручка, блокнот, пакет, значок, конверт, открытке, кӱсеныш пыштыме календарь, термокружка, свитшот, путешествийыш пырля коштыктымо кӱпчык да молат. Варажым тыгай сатум тӱнямбал, Россий кӱкшыт турист форумлаштат презентоватлаш тӱҥалыт.
С.НОСОВА
