Студент пагыт – эн весела тат. Туге гынат тунемаш пурышо самырык еҥ икымше тылзылаште икмыняр йӧсылыкым вашлиеш. Тиде у еҥ-влак дене вашкылым ыштымаште коеш, жапым чын кучылт моштыдымаште палдырна. Школысо деч ойыртемалтше тунемме предмет-влакат нелын чучыт. Тиде жапым куштылгын илен лекташ манын, психолог Ольга Камнеева индеш каҥашым ямдылен.
- Шыргыжса. Тыге пырля тунемшыда-влак дене вашкылым писынрак муыда.
- Нердам кӱш ида нӧлтӧ. Вожылын, ӧрын шогымымат еҥ-влак йоҥылыш умылен кертыт. Те нунын дене мутланаш аптыранеда, а лишне улшыда-влак шкендам пеш кӱшкӧ шындеда манын шоналтат.
- Порылыкдам ончыктыза. Иктаж-кӧ тыланда огеш келше гынат, луктын ида каласе.
- Шарныза – еҥ-влак тӱрлӧ койышан улыт. Нуно нимом тыланда кӱлмӧ семын ышташ огыт тӱҥал. Тидлан сырыман огыл.
- Ида йогылане. Шкендам тӱҥалтыштак пашаче семын ончыктеда гын, умбакыжым ӱшанле еҥ лийыда.
- Весылан полшаш ямде лийза. Тидым пырля тунемше-влакат, туныктышат аклаш тӱҥалыт.
- Ида шойышт. Кеч-могай шоя жап гыч почылтеш. У корным уда койыш гыч ида тӱҥал.
- Манеш-манешым ида ойло. Еҥым шеҥгеч вурсымат сай огыл.
- Пырля тунемше коклаште тӱшкалан пайлалтмым шекланеда гын, нигушкыжат ида ушно. Кажныж дене келшаш тыршыза. Тыге те тӱрлӧ сырымаш деч утлен кодыда.
