Российыште арака дечын аяргымылан кӧра илыш гыч кайыме шотышто рейтингым ыштыме.
Ончыл верыш Киров, Ярославль область-влак да Марий Эл Республик лектыныт. Росстатын данныйже почеш, тений январь гыч август марте Киров областьыште 10 тӱжем еҥлан шотлымаште арака дечын аярген колымо 16,7 случайым регистрироватлыме, Ярославль областьыште – 16,3 случайым, Марий Элыште – 16,2 случайым.
Калмыкий, Чечня Республиклаште, Астрахань, Ростов областьлаште, тыгак Мӱндыр Эрвелын икмыняр регионыштыжо спиртан напитке дене аярген колымо ик случайымат регистрироватлыме огыл.
Тылеч ончыч Роспотребнадзор Российын ик эн йӱшӧ регионжо-влакым ончыктен: эн начар сӱрет – Магадан областьыште, тушто ик еҥлан шотлымаште 14 литр утла яндар спиртым йӱыт. Эн йӱшӧ регион-влак спикыш тыгак Москва, Сахалин область да Коми Республик пуреныт, тушто тиде показатель 13 литрым эртен.
М.ИВАНОВА.
