Теле тургым эркын-эркын мучашке лишемеш. Тыге спортын икмыняр видыштыжат иктешлымаш таҥасымаш-влак эртаралтыт: ече, хоккей…
Кундемыштына хоккейлат сайын модыт. Мутлан, кажне ийын ял шотан илем-влак коклаште тӱрлӧ таҥасымаш эртаралтеш. Тидыже ял калыкын поро кумылжо кӱшеш вияҥеш. Верысе калык, чумырген, хоккей коробкым ышта, командым поген, тренировкым эртара да турнирыште вийжым терга. Теве мӱндыр Курыкмарий районыштат тений спортын ты видышкыже шым команде кумылын ушнен.
– 2017 ий шыжым Микрак ял шотан илемыште у хоккей коробкым ыштеныт. Тысе самырык-влаклан жапым пайдалын эртараш тидыжым сай йӧн семын палемдыман, – манеш районышто физкультур да спортлан вуйын шогышо В.Семёнов. – Хоккейлат талын модыныт. 24 мартыште ты вид дене тургымым иктешлыме. Икымше верым Кулаково, кокымшым Микрак, кумшо верым Усола ял шотан илем-влак налыныт. Сеҥыше ден призёр-шамычым саламлаш Марий Эл правительстве председательын икымше алмаштышыже Михаил Зиновьевич Васютин толын. Ончыко лекше командылан шарнымашан пӧлек ден кубокым (снимкыште) кучыктен. Икымше верым налше команде ончыкшым кугу чапле чайник гыч шокшо чайым йӱаш тӱҥалеш.
Е.Эшкинина.
