Мини-футбол дене сокыр-влак коклаште Российын сборныйжо тўнямбал чемпионат деч ончыч Италийыште тренировкым эртен. Марий Эл гыч «Спартак» командын модшыжо А.Куклин «Россия-2» командын чапшым арален. Икымше кечын футболист-влак «Россия-1» сборныйым, вес вашлиймаште «Италия-2» командым сеҥеныт, но финалыште сеҥалтыныт. Италий сборныйын капкашкыже Андрей ныл мечым пуртен.
Такшым Российын сборный командыштыже Йошкар-Оласе «Спартак» команде гыч куд футболист шотлалтеш.
Турнирын эн сай вратарьжылан Кирилл Печениным, эн сай бомбардирлан Евгений Ивановым ойыреныт. Коктынат «Спартак» гыч улыт.
Российысе футболист-влакын сборышт 30 майыште иктешлалтын.
Тўнямбал чемпионат 5-8 июньышто Испанийыште лиеш. Элнан командыже шке тўшкаштыже Китайын, Мексикын, Эрвел Корейын сборныйжо-влак дене модеш.
Е.Эшкинина.
