Спортын тӱрлӧ видше дене ятыр таҥасымаш эртаралтеш. Мемнан спортсменна-влак ӧрдыж кундемыштат вийыштым тергат, сай кӱкшытыш шуыт, Российын сборный командыжын чапшым аралат.
Таче Шернур кундемын чолга ӱдыржӧ П.Петухова (тренерже С.Шабердин) нерген мутем лукнем. Полина Чебоксарыште тунемеш, туштак тренировкым эрта, тӱрлӧ кӱкшытан турнирлаште вийжым терга. Спорт – тиде спорт, сандене кунамже сеҥалтешат, ончыкат лектеш.
Шукерте огыл, март мучаште, землякна Японийыште тӱнямбал турнирыште (К-1) вийжым терген. Тыгайже марий ӱдырын икымше гана лийын. Таҥасымаште опытан да виян верысе соперниклан сеҥалтын.
Кикбоксинг дене спорт мастер тиде бойым опытым погымо сай йӧн семын палемда.
– Икымше профессионал бой йот элыште эртен. Сеҥалтынам, но кумылем волен огыл. Тыгай кӱкшытан таҥасымаште шкем моло дене таҥастараш лиеш, тренировкым ыштыме годым молан кугу тӱткышым ойыраш кӱлмым пален налат. Тренерем Сергей Витальевичлан ямдылымыжлан, шуко жапым ойырымыжлан тау. Кана соперникем ийготшо да мастар улмыж дене ойыртемалтын, – манеш П.Петухова.
Эртыше кечылаште латкандаш ияш Полина Ялтыште кекусинкай дене эртыше Российын чемпионатыштыже таҥасен. Ӱдыр нокаутым ыштен, пелефиналыш лектын, но икымше вер верч бойышто сеҥалтын.
– Чынжым каласаш гын, чемпионко лияш мо мешаен, шкежат умылтарен ом керт. Соперникемжат путырак тале ыле манаш ок лий, адакшым Японий деч вара спорт формым поген шуктымо. Палем, шукышт икымше лиям манын шоненыт, вученыт, но ты гана ӱшаныштым сулен шым керт. Ший медалят – результат. Эн тӱҥжӧ – кумыл ынже воло, ончыкылык вес сеҥымашлан ӱшанаш, ямдылалташ, – ойла П.Петухова.
Е.Эшкинина.
