13-18 мартыште Йошкар-Ола воктенсе «Корта» ече базыште спорт туризм дене Российын первенствыже эртен. Тушко Российын 23 субъектше гыч 14-15 ияш (тыгак кугурак-влакат) 300 утла спортсмен чумырген.
Нуно тӱҥ налмаште Юл кундем федерал округ гыч лийыныт. Тыгак Москва, Коми Республик, Владимир, Краснодар, Свердловский, Томск, Челябинск областьла, Ямало-Ненецкий автономный округ гыч ӱдыр-рвезе-влак вийыштым тергеныт. Эсогыл Казахстан гыч толыныт. Мероприятийын программыштыже кум вид палемдалтын: личный, мужыр да 4 еҥ дене таҥасымаш.
Икмыняр кече ече базе, Корта воктенсе чодыра пуйто спорт полигоныш савырненыт. Организатор-влак ечыгорнымат, технический этапланат (тыгайже икмыняре лийын) верым сайын ямдыленыт. Игече юалгырак, мардежанрак ыле гынат, спортсмен-влаклан тиде чаракым ыштен огыл. Нуно игечын тӱрлӧ койышыжлан тунемыныт. Пушеҥге гыч пушеҥгыш кандыра дене шӱкалалтын кайымекышт, южышт шке канатешыштат путайкалалтыныт. Теве тидыже результатым изиш лушкыдемден. ™дыр-рвезе-шамыч тӱҥалтыште ик километр кутышым ече дене куржыныт, вара технический этапым эртеныт. Чылан писын да чын ышташ тыршеныт. Эн ончыко Марий Элын командыже лектын. Чылаже 65 медальым сеҥен налын. Тушечын 31 медальже – шӧртньӧ. Арам огыл оза-влак коклаште К.Мумбаракшина ден Р.Урдяков чемпион лӱмым сулен налыныт.
Участник-влакын результатышт Юл кундем Федерал округышто эртаралтше «Туриада» спортивно-туристский лагерьыш ойырымо семын лийын. Тудыжо Россий президентын Юл кундем федерал округысо полномочный представительже М.Бабичын тӱҥалтышыж дене кажне ийын эртаралтеш. Йӱлаш пурышо проектын лектышыжат уло: вич ийыште спортсмен-влак коклаште сеҥыше да призёр радамыш логалше-шамыч 1,5 пачаш ешаралтыныт.
– Мемнан элыште ече – ик эн пагалыме тӱшка спорт. Тиде вид койыш-шоктышым пеҥгыдемда, чыташ, ончылан шындыме задачым шукташ туныкта. Ӱшанена: таҥасымаш у лӱмым шочыкта, ече спортлан умбакыже вияҥаш полша, – палемден Марий Элыште тӱҥ федерал инспектор П.Журавлёв.
Палаш: Российын первенствыже мемнан дене нылымше гана эртаралтын. Самырык-влак коклаште – шымше гана. Марий Элын сборный командыштыже эн шуко участник лийын – 30 еҥ. Тушто Кужэҥер, Марий Турек, Шернур, Курыкмарий районла да Йошкар-Ола гыч ӱдыр-рвезе-влак лийыныт.
Тений ӧрдыж кундемла гыч толшо-влак организатор-шамычын сайын, профессионально ямдылалтмыштым, чапле спорт полигоным ыштымыштым, таҥасымашым сай кӱкшытыштӧ эртарымыштым палемдышт. Сандене ончыкшым тыште тиде вид дене Российын чемпионатшым эртараш лиеш манынат ойлышт.
Апрельыште Марий Элыште спорт туризм дене адакат Россий кӱкшытан таҥасымаш лиеш. Ындыжым элнан тӱрлӧ кундемже гыч 600 спортсменым вучат.
Е.Эшкинина.
