СПОРТ

Спорт: Ачаж лӱмеш таҥасымаш

23 декабрьыште У Торъял поселкышто ече сезон почылтмо да Совет Ушемын ече дене ший призержо Андрей Тарасович Наумов лӱмеш таҥасымаш эртен. 

Андрей Тарасович – Кугу Отечественный         сарын участникше. 1953-1990 ийлаште «Первый май» колхозышто водительлан, механиклан ыштен, гаражымат вуйлатен. «Марий АССР-ын эн сай водительже» чап лӱм, «За трудовое отличие» медаль дене палемдалтын, Почетан колхозник лийын.

Шуматкечын ече дене эртыше таҥасымаште У Торъял, Кужэҥер, Советский, Шернур районла гыч 90 еҥ шке вийжым терген.

2006 ийыште шочшо да тылечат изирак ийготан рвезе-влак коклаште икымше верыш Степан Матвеев (Тошто Торъял школ),  ӱдыр-влак коклаште Яна Соловьева (Овалже школ) лектыныт. Эн кугу ийготан — 50-59 ияш – ӱдырамаш-влак коклаште Светлана Лазарева (Шернур), тыгаяк ийготан пӧръеҥ-влак коклаште тушечак Геннадий Макаров эн писе лийыныт. 60 ий да тылеч кугу ийготан пӧръеҥ-влакат таҥасымашыш ушненыт. Нунын коклаште Виктор Якаев (Советский) финишыш эн ончыч толын шуын.

Сеҥышыш лекше-влаклан Чап Грамотым да медальым кучыктеныт.

Йошкар-Олаште У Торъял землячествым вуйлатыше семын Виктор Наумов тиде таҥсымаш мучаште шке шотан пӧлекым ыштен — районысо чыла школлан «Марий Эл» газетлан подпискым ыштымыж нерген каласен. А чолгалыкым ончыктымыжлан да тыгай таҥасымашым эртарымыжлан Марий Эл Республикын Спорт ветеранже-влак ушем Тауштымашым кучыктен.

Л.Камалетдинова.
В.Наумовын фотожо.

Опубликовать в Одноклассники

Добавить комментарий