Звенигово районысо Красногорский тӱвыра пӧртын «Союз» калык студийжылан 30 ий темын.
Провой кундемыште веле огыл, чумыр Марий Элыште кумдан палыме эстраде муро студийын репертуарже марий да руш муро-влаклан моткоч поян. Солист-влак К.Федорова, Н.Павлова, Н.Софонова, С.Зобкова, В.Волжанин, А.Васильев, В.Дворянинов, Д.Файзрахманов, Г.Васильев, Т.Смирнова, А.Шульцова тӱрлӧ фестиваль-конкурсышто лауреат лӱмым налыныт. Студийыш тӱрлӧ ийготан йоча-влак мураш тунемаш коштыт. Нунын чотышт ий еда ешаралтын толеш.
Усталык коллектив 30 ияш лӱмгечыжлан «Адакат пырля!» чапле концерт программым ямдылен. Тушко «Союзын» илыш корныж дене кылдалтше чыла еҥ чумырген да кажныже шке жапысе мурыжым йоҥгалтарен.
«Союз» калык студий тиде юбилей концертше дене республикын районлашкыжат лекташ палемден.
М.ИВАНОВА
