1 май гыч россиян-влакын пашалан тӱлымӧ эн изи кугытыштым (МРОТ) илен лекташ лийме кугыт дене тӧремдыме да курорт сборым пуртымо.
1 май гыч законодательствыш кӱлешан икмыняр вашталтышым пуртымо, тудым Российысе калык дене пырля Марий Элыште илыше-влакат шижыт. Ынде Российыште эн изи пашадар 11163 теҥге лиеш. Тышечын налог кучалтеш, сандене южо еҥ кидышкыже МРОТ деч шагалрак пашадарым налеш.
Ушештарена, МРОТ-ын кугытшо южо платёж ден сборым шотлымо, тыгак пособийым палемдыме годым шотыш налалтеш. 2018 ий I кварталым иктешлыме почеш, Марий Эл правительстве пашам ыштен кертше еҥ-влаклан илен лекташ лийме 9635 теҥге кугытым палемден ыле.
1 май гычак Российыште пожар лӱдыкшыдымылыкын у национальный стандартшым илышыш пуртымо. Тудо пожар нерген увертарыше, тулым йӧртымӧ системе-влакым, тыгак эвакуацийым виктарыме устройство-шамычым жапын-жапын тергыме пашам обязательныйым ыштен. Тергымашым организоватлымылан да эртарымылан зданийын собственникше мутым куча.
Вес у вашталтыш – Ставрополь крайысе да Алтайысе курортлаште курорт сборым налаш тӱҥалыныт. Нине регионыш канаш мийышылан суткаште 50 да 30 теҥгем ешарен тӱлаш логалеш.
Тылеч посна, 1 май гыч Российыште волонтёр-влакын правовой статусыштым официально палемдыме.
М.ИВАНОВА.
