Марий Элыште 8000 утла еҥ социальный услуго дене мӧҥгыштӧ пайдалана.
Таче регионыштына социально обслуживатлыме тӧнежын сетьше пашам ышта. Тудо илалше еҥ ден инвалид-шамычлан тӱрлӧ социальный полышым пуа. Мӧҥгыштӧ социально обслуживатлыме формо поснак кугу йодмаш дене пайдалана. Тудын сай велже илалше еҥ ден инвалид-шамычын мӧҥгыштак, шӱм-чонлан келшыше верыштак, илымышт да тыгодымак социальный полышым налмышт дене кылдалтын. Тидыже нунын шӱм-чоныштлан моткоч пайдале.
2017 ийыште калыкым социально обслуживатлыме 17 рӱдер пелен мӧҥгыштӧ социально полшымо 50 пӧлка пашам ыштен. Олаласе да районласе социальный пашаеҥ-влак 8264 еҥым онченыт (ӱмашсе дене таҥастарымаште 519 еҥлан шукырак), ты шотыштак 453 еҥ пелен сиделке семын шинченыт. Социально-бытовой, социально-медицинский услуго-влак кокла гыч утларакше продовольственный да продовольственный огыл сатум мӧҥгышкӧ налын кондымо, шокшо кочкышым ямдылыме, илыме да коммунал услугылан тӱлымӧ, вӱдым кондымо, коҥгаш олтымо, илыме верым эрыктыме, врачын рецептше почеш эм ден медицине изделийым ситарыме шотышто йодмаш-влакым шуктеныт.
2017 ийыште 2 млн.утла услугым пуымо, ты шотышто социально-бытовойым – 644 536, социально-медицинскийым – 179093, социально-психологическийым – 184055, социально-правовойым – 3183. Тылеч посна тичмашын тӱлыман 1,3 млн. услугым пуымо.
Ушештарена: мӧҥгыштӧ социально обслуживатлыме форман социальный услуго черланымылан, сусыргымылан, ийготым погымылан, инвалид лиймылан кӧра шке семын тарванылын, шкем ончен, нимом але чылажымак огыл ыштен кертдыме илалше еҥ ден инвалид-влаклан пуалтеш.
М.ИВАНОВА.
