Марий Эл Республикыште 2018 ийыште ялозанлык культур-влакын сортыштым шымлымын лектышыжым иктешлыме совещаний лийын.
Погынымаште районласе ялозанлык управленийын (отделын), «Госсорткомиссий», «Россельхозентр» ФГБУ-влакын Марий Эл Республик шотышто филиалыштын еҥышт, ялозанлыкым научно-шымлыше Марий институтын ученыйжо, Ялозанлык да продовольствий министерствын, тӱшка озанлык-шамычын специалистышт ден фермер-влак лийыныт.
Министерствын кушкылым ончен куштымо да технический политике отделжын начальникше Э.Каштанов 2018 ийыште кушкылым ончен куштымаште шумо лектыш дене палдарен. Тыге тений гектар еда 18,6 центнер пырчым шийме, чумыржо 227 тӱжем тонным погымо. Пареҥгым кажне гектар гыч кокла шот дене 158 центнерым налме, а пӱтынь налмаште 36 тӱжем тонн лектын. Пакчасаскам 35 тӱжем тонным, але гектар еда 270 центнерым, погымо. Вольыклан чоштыра да нӧрӧ кургым ситышын шапашлыме.
Республикыште районироватлыме да нылымше зоно ялозанлык культурын чапле лектышыжым палемдыме. «Московская — 56», «Волжская К», «Безенчукская – 380» кокияш шыдаҥ, «Татьяна», «Рушник», «Татарская 1» кокияш уржа, «Екатерина», «Симбирцит», «Экада 109» икияш шыдаҥ, «Родник Прикамья», «Память Родиной» шож, «Кентер», «Скакун», «Буланый» шӱльӧ, «Рокет», «Аксайский усатый 55» пурса поснак сайын шочыныт.
«Госсорткомиссий» ФГБУ-н Марий Эл Республикысе филиалжын начальникше Э.Якимован ойлымыж почеш, тений сортым шымлыше кугыжаныш куд участкыште 356 сорт да 28 гибрид ялозанлык культур дене 977 опытым эртарыме. Шымлымын лектышыж почеш, республикыштына вич сорт пырчан культурым, тидын шотыштак «Бете» кокияш да «Доброе» икияш тритикалем, «Грум» шӱльым, «Кулон» да «Ямальский – 305» пурсам, кургылык кушкыл кокла гыч «Сукрал» сорт райграсым районироватлаш темлыме.
Тений чапле лектышым да чер ваштареш сайын шоген кертмым «Пила», «Танго», «Джоли» сорт пареҥге ончыктеныт. Погынымашын участникше-влак «Госсорткомиссий» ФГБУ-н Марий Элысе филиалжын специалистше-влакын организоватлыме выставке дене палыме лийын кертыныт. Тушто сай лектыш дене ойыртемалтше кушкыл-влакым ончыктымо.
В.Смоленцев.
Фотом Ялозанлык да продовольствий министерствын сайтше гыч налме.
