Йошкар-Олаште верланыше Т.И.Александрова лӱмеш 11-ше №-ан лицейын тунемшыже Максим Медведев «Россий – йӧным ыштыше эл» президент платформын «Мыйын элем – мыйын Россий» всероссийский конкурсыштыжо сеҥыше-влакын радамышкыже лектын.
Рвезын «Мыйын тазалыкем» проектше рӱдолаштына аллергий дене черланыше-влаклан условийым ыштыме дене кылдалтын.
«Ме ӱшанена, ончыкыжым калыкын илыме кумдыкшым тӱзатыме годым тыгай черан еҥ-влакым шотыш налын, кушкылым шындаш тӱҥалыт. Мыйын шонымаште, тиде проект Йошкар-Оланалан веле огыл, Российын кажне олажлан кӱлешан», – ойла Максим.
Тиде гана «Мыйын элем – мыйын Россий» XVIII всероссийский конкурсышто Россий да моло эл (Беларусь, Украина, Азербайджан, Египет, Вьетнам, Великобританий, США да молат) гыч 91 147 участник лийын. Тышеч заочно эртыше этап деч вара финалыш 762 конкурсант лектын.
«Россий – йӧным ыштыше эл» АНО-н генеральный директоржын алмаштышыже А.Агафонов палемден: «Кажне ийын конкурсыш школышто тунемше-влак шукын ушнат, мыланна проектыштым колтат. Тений тиде радамыште Российын 46 регионжо гыч 14-17 ияш 126 ӱдыр-рвезе лийын».
Ты гана тематический направлений-влак тыгай лийыныт: шанче, технологий, космос. Адакшым тушко икымше гана 13 ияш марте йоча-влакат ушнен кертыныт, нунылан лӱмынак «Космос нерген йомак» номинацийым ыштыме. Тыге тушко 10 000 утла икшыве йомакым, сӱретым да моло усталык пашам колтен. Тышеч сеҥыше-влакын радамышкышт элын 44 регионжо гыч 100 ӱдыр-рвезе лектын.
Г.КОЖЕВНИКОВА
