УВЕР ЙОГЫН

Сеҥыше-влак радамыште — «Кугарня»

Руш православный черкын эртарыме «Православный инициативе 2018-2019» тӱнямбал грант конкурсшо иктешлалтын. Тудын сеҥышыже-влак коклаште Марий Эл гычат улыт.

Сеҥыше-шамычым ныл номинацийыште палемденыт: «Образований да воспитаний», «Тӱвыра», «Социальный служений», «Информационный паша». Конкурсын грант фондшо  115 миллион теҥгеш шуын. Грант оксам тӱрысшӧ 255 проектлан ойырат.

Проект-влакым 20 март гыч илышыш шындараш тӱҥалыт. Марий Эл гыч ныл проектлан шийвундо ойыралтеш. Икымшыже — Йошкар-Оласе историй тоштер. Тудын проектше «Царёв град без преград»  маналтеш. Тудын дене келшышын, тазалык шотышто начар улшо экскурсант ден турист-влаклан турист маршрутым ласкан ончал савырнаш йӧным ыштат.

«Свято место пусто не бывает»  проектым У Торъял районысо Пектубай психоневрологический интернат темлен. Тудо нелын черланыше еҥ-влаклан куштылгырак лийже, тазалыкыштым, социальный статусыштым пеҥгыдемден, морально-психологический шижмашыштым саемден  кертышт манын, православий шӱлышан верлаш миен кошташышт йӧным почшаш.

Тиде кок проектше «Социальный служений» номинацийыште сеҥеныт гын, кумшыжо тӱвыра дене кылдалтын. Звенигово районысо Красногорский психоневрологический интернат «Дорогою добра» проектым илышыш шыҥдараш тӱҥалеш. Тудо тазалык шотышто начар еҥ-влакын илыме учрежденийыштышт православийын идейже-влакым шараш да тидын дене нунын илышыштым мыняр-гынат куштылдемдаш полшышаш.  

Сеҥышыш лекше нылымше проектым «Информационный паша» направлений дене «Кугарня» газет темлен. Тудын «Святой черке пелен» проектше самырык-влак коклаште православий тӱвыра шотышто шинчымашым марий йылме дене шараш виктаралтын.

С.Носова

Опубликовать в Одноклассники

Добавить комментарий