Эртыше кечылаште ече дене Марий Эл чемпионатын кокымшо этапше мучашлалтын. Игече ночкыраклан кӧра результат изиш начарештын, но участник-влак чылалан ямде улмыштым ончыктеныт, ечыгорнышто тале таҥасымаш лийын. Икымше кечын эрыкан йӧн дене 10 километр кутышышто абсолютный чемпион Д.Чекулаев (УОР, РМТ; 26,22 мин) лийын. Тыгак С.Егоров (РМТ, Параньга; 27.32 мин) ден Н.Васильев (Морко, 28.31 мин) сай результатым ончыктеныт.
Ӱдырамаш-влак коклаште Н.Морозова (Волжск, МЦБК; 16.52 мин) ончыко лектын. Кокымшо – А.Романова (Медведево, 16.52.04 мин), кумшо верыште – К.Солонько (Волжск, Динамо; 17.21.04 мин).
Кокымшо кечын классик йӧн дене пӧръеҥ-шамыч коклаште чемпион вашталтын. Тыште Станислав Егоров виянрак лийын. Кокымшо – Д.Чекулаев.
– Талырак ечызе лектыт, соперник уло – результат саемеш. Самырык-влак коклаштат ечылан шўман-влак улыт. Тидыже куандара веле, – палемда ече дене опытан тренер Е.Рыбаков. – ӧрдыж кундемлашкат лектыт, ойыртемалтын, сай пӧлек дене палемдалтыт. Мутлан, Зеленодольскышто 15 километрыште Дмитрий Чекулаев кок камеран холодильникын, Стас Егоров вишкыде кристаллан телевизорын озашт лийыныт.
Физкультур коллектив команде-влак коклаште икымше верыш адакат РМТ-ын командыже лектын (2188 очко). 23-шо гана чемпион. Кокымшо верыште – Динамо (1804 очко), кумшо – МарГУ-н командыже (1744 очко).
Район-влак коклаште икымшым Волжск олан (1912 очкор), кокымшым Медведево районын (1770 очко), кумшо верым Морко районын (1202 очко) командышт налыныт.
4-ше вер – Шернур район (1162 очко);
5-ше вер – Кужэҥер район (741 очко);
6-шо вер – Йошкар-Ола (439 очко);
7-ше вер – Курыкмарий район (344 очко);
8-ше вер – Волжский район (307 очко).
Е.Эшкинина.
Снимкыште: 23-шо гана чемпион лийше РМТ-ын командыже.
Фото: Сервер/ Эшкинина/ 038
