УВЕР ЙОГЫН

Сеҥымаш парк… але Мондалтдымым шарныкта

 «Ола кумдыкым тачысе илышлан келшышын тӱзатымаш» федерал программым» умбакыже шуэн, калык йӱклымаште 2-шо верым налше, Сеҥымаш паркым пужен уэмдыме паша олаште илыше-влакым куандара. Уэмден тӱзатышаш черетан кумдык сарыште кредалше да тылыште тыршыше-влакым чапландарыше каныме верыш савырнышаш. Палемдыме график почеш ыштен шукташ манын, пашазе-влак йӱран игечыштат, каныш кечылаштат, кастене пычкемыш лиймешкак тыршат.

Кодшо кечылаште мэрын икымше алмаштышыже Л.Покровский «Муниципал заказ дирекций» казна учрежденийын директоржо А.Коротков, Ленин лӱмеш тӱвыра полат директор Х.Гуцунаев, «ММЗ» завод гыч толшо да «Строй-Снаб 12» подрядчикын ӱшанъеҥже дене пырля паркым тӱзатыме ончыкылык пашам верыш лектын каҥашышт. Лев Константинович ден Александр Геннадьевич ты жаплан паркыште мом ыштыме да ончыкыжым шуктышаш план дене палдареныт.

–Сеҥымаш паркын могай лийшашыжым калык дене пырля каҥашенна, – ушештарыш мэрын икымше алмаштыже. – Ыштышаш пашан тӱрлӧ-тӱрлӧ улмыжлан да шуктымо жап дене ойыртемалтмыштлан кӧра, тудым икмыняр ужашын шукташ тӱҥалына. Тудо 12 миллион теҥгеш шуын. Тӱҥалтыш эта  икмыняр тылзе ончычак мучашлалтын. Тылечат кугу ( 35 миллон теҥгеаш) пашалан торгым увертарыме. Сеҥыше теве-теве пале лийшаш. Тыштыже конструкций ойыртемлан веле огыл, уэмдыме кумдыкым ик тичмашын койшым ышташ кугу тӱткышым ойырымо. Уэмдыме верын сарыште кредалше да тылыште тыршыше-влакым чапландарыше сынан улмыжым мемориал памятник, стелле, неле военный технике ушештараш тӱҥалыт. Кугу сарыште кредалше герой-влакым чапландарым паркыш каналташ толшо кажне еҥ шижшаш. Тӱҥ «капка», (план почеш тудо Свердлов урем гыч толмаште) аллей кок велне герой-шамычын лӱмыштым возыман лу стелле, палдараш тӱҥалыт. Ончыкыжым парк покшелне Георгий Победоносецлан монумент лийшаш. Тудын  шеҥгелне тӱрлӧ верыш кусараш йӧршӧ (мобильный) сцене вераҥдалтшаш.

– Кызыт тусовоенный технике-шамычым пурымо тӱҥ «капкан» пурла велышкыже кусарыме, – мутланымашым шуйыш А.Коротков. –  Монументым шогалташ мешайкалыше икмыняр пушеҥгым кораҥдыме. Пашазе-влак ончыкылык рӱдӧ аллейын кугу ужашыштыже брусчаткым оптат. Лишыл кечылаште тылыште тыршыше-влаклан памятник тураште тошто брусчаткым кораҥден, уым вераҥдылаш да асфальтым шараш тӱҥалына. Ты стелле паркыш Зарубин урем велым пурымашке кусаралтеш. Брусчаткым оптымо деч вара, а тудым август мучашлан ыштен пытараш шонена, умбакыже изи архитекруный формым вераҥдылаш шонена.

Кокымшо этапыште тротуарым шараш тӱҥалына. Кызыт тидланат торгым увертаренна. У сценым пытартыш жапыште лукмо чоҥымо материал дене келыштарена. Парк кумдык декоративный кушкыл, ужар газон, пеледыш клумбо дене моторын сӧрастаралтшаш, чапле кӱртньӧ авыртыш дене авыралтшаш, – мутшым мучашлыш Александр Геннадьевич.  

Паркым тӱзатен уэмдыме деч вара тудын кумдыкыштыжо монумент, стелле, аллей-влак, сцене, йоча площадке, кок тӱрлӧ спорткомплекс, тазалык шотышто экшыкан еҥ-влаклан леведышан спорт площадке деч посна тушко пурымаште шӱдӧ утла автомашинам шогалташ вер лийшаш.    

Тиде чылажат ончыкыжым, а кызыт тыште чоҥымо паша кая гынат, ныл ий ончыч келыштарыме кок спорт площадкыште йоча-шамыч куанен тӧрштылыт. Тыштак спортын ик оҥай видшылан, скейтбордлан, кумылан-влаклан, яклешдыме резинке кумдыкыш лӱдыкшыдымӧ у оборудованийым вераҥдыме. Тышке толшо, оксам тӱлыде, скейт-паркыште ролик дене кудалыштын кертеш. Кок-кум кече ончыч пийым коштыктымо посна площадкым табличке дене палемдыме вес верыш кусарыме.

Р.Чепакова

 

Снимкыште: ыштышаш пашам каҥашыме годым;

паркым уэмдыме план.

Администраций сайт гыч налме фото-влак.

Опубликовать в Одноклассники

Добавить комментарий