Марий Элыште утларак ямде улмо режимым 18 апрель марте шуйымо.
15 мартыште регионым вуйлатыше Александр Евстифеев 2020 ий 17 мартыште лукмо «Марий Эл Республикыште утларак ямде улмо режимым пуртымо нерген» 39-ше №-ан указышке вашталтышым пуртен. У редакций дене келшышын, республикыштына утларак ямде улмо режим 18 апрель марте шуйна, да публичный ден шуко еҥым иквереш чумырышо мероприятий-шамычым эртарыме дене кылдалтше чарак-влак указыште палемдыме ойыртемым шотыш налын кучылталтыт.
Россий Федерацийын сайлымаш да референдум нерген законодательствыж дене келшышын, сайлымаш ден референдумым, ты шотыштак сайлыме объединений-влакын кандидатым темлымышт але шкем шке темлыме да вараже кандидатлан полшымо семын кидпалым погымо, тыгак Кугу Отечественный сарыште сеҥымылан 76 ий темме лӱмеш торжественный парадым эртарыме шотышто мероприятий-влакым нине радам гыч кораҥдыме.
Палемдыме мероприятий-влак COVID-19 шарлен кертме лӱдыкшӧ улмо условийыште Потребительын праважым аралыме да айдемын илышыжым аралыме аланыште надзор шотышто федеральный службын йодмашыж дене келшышын эртаралтшаш улыт.
Тылеч посна А.Евстифеев у коронавирус инфекций шарлыме годым калыкын илышыжым арален кодымо шотышто мере-шамычын вийыште улмышт жапыште республикыштына пашам ыштыше организаций-влакын радамышкышт вашталтышым пуртен.
Марий Эл Республикым вуйлатышын организаций да
аналитике виктемжын уверже негызеш
М.ИВАНОВА ямдылен
