Марий Элын Социальный вияҥмаш министерствыже Сеҥымаш кечылан пӧлеклалтше «Ветеран пеленна ила» эстафетым иктешлен.
Эстафетыште лӱдыкшӧ положенийыште улшо ешыште кушшо икшыве, калыкым социально обслуживатлыме комплексный рӱдер да Кугу Отечечственный сарын ветеранже-влак участвоватленыт.
Акцийым увертарыме годым организатор-влак тыгай задачымат палемденыт – «неле» подростко-влакым Кугу Отечественый сарын участникше-влакым Сеҥымаш кече дене саламлаш кумылаҥдаш, сар ийласе событий, тушто кредалше-влак дене палдараш, нуным пагалаш кӱлмым умылтараш, тыгак гражданственность да патриотизм шӱлышеш кушташ.
Эстафете кышкарыште йоча-влак ветеран-шамычлан шке кидышт дене пӧлекым ямдыленыт, тӱрлӧ пашам ышташ полшеныт. А чыла тидлан тауштымо шот дене илалше-шамыч нунылан сар жапысе илышышт нерген каласкаленыт.
Эстафетым иктешлыме годым социальный вияҥмаш министр Ольга Фёдорова палемден: «Кугу Отечественый сар кажне ешым тӱкен. Миллион дене ава эргыжым вучен шуктен огыл, миллион дене йоча ача деч посна кушкын. А сӧй гыч пӧртылшӧ-шамыч пеле шаланыше элнам нӧлтеныт. Чаманен палемдыман, сарын южо участникшылан тиде ий пытартышат лийын кертеш. Тунамсе тукым пытен толеш. Кугу Сеҥымашым ужшо, военный событийлаште чынже денак кредалше-влак кечын шагалемыт. Сандене мыланна нунылан тауштен, нуным колыштын да тунамсе шучко историй-влакым возен коден шукташ кӱлеш».
Мероприятийыште тыгак йоча-влакын ямдылыме альбомышт ден эстафетым иктешлыше фильмыштым презентоватлыме. Альбомыш Кугу Отечественный сар нерген оҥай факт ден шарнымаш-влакым, тыгак йоча-шамычын ветеран-влак дене вашлиймышт нерген возымыштым пуртымо.
«Йыргешке ӱстел» йыр погынышо-влакын мутышт почеш, тиде эстафете ветеран ден кушкын толшо тукымлан шергакан да пайдале опыт семын лийын. Тудын полшымыж дене южо ветеран ден йоча икте-весылан келшеныт да кызытат вашлийыт, умбакыжат кылым кучаш шонат.
9 майыште альбомым республикысе районлашке да олалашке колтымо. Мероприятийын моло кундемыште лачшымак кузе эртымыжым, шке паша лектышыжым акцийын кажне участникше ужын да аклен кертеш.
М.ИВАНОВА.
