22-25 октябрьыште Марий кугыжаныш университетын Калыкле тӱвыра да тӱвыра кокласе коммуникаций институтын студенткыже Анастасия Галиева Пермь кундемыш миен коштын.
«Мый Пермь олаште эртыше «Национальный единствын всероссийский форум» мероприятийыште лийынам. Форум жапыштак «Лидер НКО — 2019» конкурс эртаралтын. Тушто Санкт-Петербург, Моско, Петрозаводск, Псков, Красноярск, Тыва, Казань, Елабуга, Магадан, Ханты-Мансийск, Сургут да Марий Эл гыч 30 участник шке вийнам тергенна. Мый «Интеллектуал» тӱвыра-увер рӱдер» организацийын «Этноблогер школ» проектше дене 3 верым налынам. Тиде пиал! Пеш ойгыренам: кузе эрта, могай йодыш-влак лийыт, интеллектуал конкурсышто мом ыштыман? Вет шуко участникше кугу опытан лийын, а мый нунын коклаште — эн самырык. Вуйлатышем Эльвира Куклина да ача-авамын полшымышт дене мый сеҥышыш лектынам. Тыгай конкурс эн ондак шке вийым тергаш да кугу опытым погаш полша», — палемдыш ӱдыр.
Финн мландыште – «шӱдыр-влак»
Тиде институтынак эше ик чолга ӱдыржӧ Надежда Имаева «Социальный сетьлаште финн-угор шӱдыр-влак» конкурсышто сеҥышыш лекмыж дене финн мландыш миен толын. Тыгай конкурс Instagram, YouTube, ВК да Facebook приложенийлаште шочмо йылме дене возкалыше 14 блогерым 16-23 октябрьыште «Sugrifest» фестивальыште чумырен. Марий ӱдыр ВКонтакте приложенийыште «Почеламут сем» тӱшкам, да Instagram-ыште ot.mondo лаштыкым вӱда.
«Шошымак «Финляндий – Россий» обществе интернетыште шочмо йылме дене возышо финн-угор самырык тукымлан конкурсым увертарен ыле. Мый, тидым ужын, йодмашым колтенам. Июньышто сеҥымаш нерген серышым налынам. Шыжым мыйым Финляндийышке кугу гастрольыш ӱжыныт. Тушто школлаште, гимназийлаште, колледжлаште да книгагудылаште шкем да калыкем нерген каласкаленам, интернетысе пашам дене палдаренам», — увертарыш Надя.
О.МОШКИНА
