«Сеҥымашын волонтёржо-влак» толкынын Марий Элысе пӧлкаже 4 февраль гыч 15 май марте команде лидер-влакын конкурсыштым эртара.
Тудын условийже почеш лу еҥан командым чумырыман. Вара нуно Кугу Отечественный сарыште Сеҥымашлан 74 ий теммыллан пӧлеклалтше республик кӱкшытан мероприятийлаш ушнышаш улыт. Конкурсыш Россий Федерацийын 18 ий деч кугурак кажне гражданинже ушнен кертеш. Тидлан претендент 10 март марте волонтерыпобеды.рф сайтыште анкетын йодышыжлан вашештышаш.
Кажне регионышто кум финалистым ойырен налыт. Нунылан «Сеҥымашын волонтёржо-влак» толкынын уэмдыме у экипировкыжым кучыктат. 2020 ийыште Москвасе Йошкар площадьыште эртышашлык юбилейный парадыште волонтёр семын финалыш лекше 10 еҥым конкурс деч посна налыт.
4 февраль гыч 5 апрель марте доброволец-влаклан тыгак «Сеҥымашын посолжо-влак. Москва» всероссийский конкурс увертаралтын.
Тушто сеҥыше-влак Кугу Отечественный сарыште сеҥымылан 74 ий теммылан пӧлеклалтше парадым да «Курымашлык полк» акцийым эртарыме пашаш ушнат.
Конкурсыш 18 гыч 30 ий марте ийготан-влак ушнен кертыт. Нуно коммерческий огыл волонтёр организаций ден ушемын, шке гыч чумырымо добровольческий тӱшкан участникше да вуйлатышыже-влак лийшаш улыт. Ты суапле пашам шукташ шонышо-влак волонтерыпобеды.рф сайтыште регистраций ден авторизацийым эртышаш улыт. Анкетысе йодышлан вашештымеке, моло условийымат шуктыман. Ты конкурс Самырык-влакын пашашт шотышто федеральный агентствын да «Йоча да самырык-влакым граждан да шочмо элым йӧратыме шӱлышеш шуарыше Российысе рӱдер» федерал кугыжаныш бюджет учрежденийын полшымышт дене эртаралтеш.
С.Носова
