Кодшо арнян Светофор Светофорыч ден ГИБДД пашаеҥ-влак «Журавушка» социально-реабилитационный рӱдерыш миеныт да йоча-шамычлан корно движений правил-влак шотышто оҥай программым эртареныт.
Вашлиймашке кинологат шке «воспитанникше» дене толын. Гета лӱман служебный пий наставникшын командыжым радамлын шуктен да тидын дене ӱдыр-рвезе-влакым чот ӧрыктарен. Тидын деч посна кинолог пийже полшымо дене «саркуралан» осал преступникым «кучен».
Гетам кажне икшыве куанен шыматен. Пият нунын дене кумылын модын да фотографироватлалтын.
Йоча-влак Светофор Светофорыч да ГИБДД пашаеҥ-влак деч шуко пайдале уверым, чапле пӧлекым да сай кумылым налыныт.
Фотом Марий Эл Республикын Социальный вияҥмаш министерствыжын сайтше гыч налме.
М.ИВАНОВА.
