Ижевскыште РФ президентын Юл кундем федеральный округысо полпредше Игорь Комаровын вуйлатымыж почеш Округын советшын заседанийже лийын. Тушто талантан молодежьлан полшымо да йоча-влакын моштымашыштым вияҥдаш, нунылан вараже профессийым налаш да кушкаш йӧным ыштен шогымо нерген мутланыме.
Марий Элым вуйлатыше Александр Евстифеев журналист-влаклан интервьюм пуымыж годым каҥашыме темын да республикысе кучемын ты корно дене шуктен толмо пашажын пеш кӱлешан улмыштым палемден. Вет талантан йоча ден самырык-влак дене пашам ыштыме пайдале системым ыштымаш 2019-2024 ийлаште образованийым вияҥдыме шумлык ик эн тӱҥ задачылан шотлалтеш, тидым Россий президентын «майысе» Указыштыжат рашемден ончыктымо, каласен тудо.
«Молодежьым вияҥдыме паша икмыняр корно дене шукталт кертеш. Тиде – отрасль шот дене вияҥдымаш, кызытсе производствышто специальный подразделений, кафедр-влакым ыштымаш. Мемнан тыгай примерна уло. Те паледа: ме учебный заведенийна-влакын статусыштым нєлтен толмым пеш кӱлешан пашалан шотлена, вузна-влак ты задачым сайын шуктен толыт. Ончыкылык паша – тиде самырык-влаклан паша верым ситарымаш, социальный проблемылам тӧрлымаш, умбакыже тунемаш, налме шинчымашым пашаште кучылташ, профессионально умбакыже кушкаш йӧным ыштымаш»,- палемден Марий Элым вуйлатыше.
Республиканский СМИ-влакын еҥышт дене мутланымыж годым Александр Евстифеев тыгак самырык специалист-влакым системе почеш ямдылаш да молодежьлан талантшым да моштымашыжым ончыкташыже йєным пуышо условийым ышташ кӱлмылан тӱткышым ойырен.
Талантан самырык еҥ-влакым пален налме, нунылан полшымо да вияҥашышт йӧным ыштыме паша у кӱкшытыш нӧлталтшаш. Тидлан межведомственный региональный координационный совет-влакым ышташ, тыгак сай ончыкылыкым сӧрышӧ самырык специалист-шамыч нерген данныян банкым вӱдымӧ пашалан мутым кучышо еҥ-влакым рашемдаш Федерацийын субьектше-влаклан темлыме.
Чыла нине корно дене шукталтше пашам РФ президентын ПФО-со полпредше эреак шинча ончылно кучаш тӱҥалеш.
Совещанийыште ойлымыж годым Игорь Комаров чапле образованиян да сайын ямдылыме самырык специалист-влак Российым вияҥден толмо утларак кӱлешан корнылаште ончыко шупшын наҥгайыше шкешотан локомотивыш савырнышаш улыт манын палемден.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
