УВЕР ЙОГЫН

Самырык-влакым «МОСТ» ушен

5 ноябрьыште С.Чавайн национал библиотекыште «Мунло» республикысе интеллектуал марафон эртен. Лач тушто мый «Сомониён» командын чолга таджик ӱдыр-эргыж-шамыч дене палыме лийынам.
Нунын кокла гыч иктыже – Мехрофарид Самадова. Тудо 2001 ий 18 ноябрьыште Таджикистаныште, Кугу Гафуровский районысо Хизтеварз ялеш, шочын кушкын. Аваже, Мехрубон Ахмедова, йочасадыште воспитательлан тырша, а ачаже, Сухроб – ик фирмыште бухгалтер. Ешыштышт ныл йоча уло. Меха (кӱчыкын туым тыге маныт) – кокымшо. Чкаловск олаште кыдалаш школым пытарен, вара – гимназийым. (Оҥайлан, Чкаловск олам 1946 ийыште чоҥымо. Тусо горно-химический комбинатыште икымше атомный бомбылан ураным руда гыч лукмо.) Школышто совет жап годсекак туныктышо-влак шукышт руш лийыныт, санденак чыла урок рушла эртен.
– Йоча-годымак врач лийнем ыле, – ойла Меха, – Кудымшо-шымше класслаште биологий ден химий предметлам келгынрак тунемаш пижынам. Тиде мыйынак манын шоненам. Нине предметлан жапым шуко ойыренам. Эн ончыч Таджикистаныште тунемме верым муаш шоненам, мутлан, Душанбеште. Ик кечын мемнан школышто «Россотрудничество» программе почеш тудын еҥже-влак толыныт. Нуно ойленыт: «Экзаменым сайын кучеда да шуко баллым погеда гын, Российысе иктаж-могай университетыш, бюджет верыш, тунемаш пурен кертыда».
Тыге ӱдыр Юл кундемым ойырен налын да Марий кугыжаныш университетыш тунемаш пурен. Меха 120 гыч 109 баллым поген. Кызыт медицинский факультетын кокымшо курсыштыжо «Лечебное дело» специальность дене шинчымашым пога.эмлызе пашалан. Тушто ныл ий тунемман, а вара кок ийже – ординатурышто.
– Тендан кундемыш толмеке, йот эл гыч шуко студентым ужынам, умылтара самырык ӱдыр. – Юмылан тау манын ойлем – нуно мыланем полшеныт. Университетыште шуко корпус уло, йомашат лиеш. Ик черетыште шогымо годым мемнан калык гычак ӱдыр – Роксана – дене палыме лийынам. Тудо мылам Таджикистан гыч студент-влакын «МОСТ» молодёжь организацийышкышт ушнаш темлен.
Меха Таджикистаныште тунеммыж годымак англичан йылме курсыш коштын, «Inermediate (кыдалаш)» манме кӱкшытыш шуын.
– Тиде жапыштак Night-fest фестиваль лийын. У йолташ-влак тушко ушнаш темленыт, таджик калыкын куштымашыжым куштен моштышо-влак кӱлыныт. Мыйжын таджик калыкын вургемжат лийын огыл. Паледа, ӧрдыж кундемыште илыме годым шочмо йылмым колат да, уло чон дене йывыртет. Фестивальыште мыланем пеш оҥайла ыле, мемнан вел гыч ӱдыр-рвезе-влак дене палыме лийынам. Марий культур рӱдер гыч Наталья Пушкина дене вашлийынам да тӱрлӧ мероприятийыште участвоватлаш тӱҥалынам. Февральыште LinguaFest територрийыште куд еҥ таджик вургемнам – рвезе-влакын вуйышкышт тюбетейке (токки), капыштышт халат (чапан) лийын – чиенна. Теве Мухаммад толеш, ончалза.
Мемнан деке «Душанбе» возыман тюбетейкым чийыше весела, шемалге рвезе лишеме. А меже «Меридиан» студент кочмыверыште да университетын фойештыже мутланенна.
– Тюбетейкыж дене, – шыргыжалын пелештыш Меха. – Ужыда, кузе моторын чиен.
Тыге Мухаммад Одинаев дене палыме лийым. Чынжымак, рвезе сайын чияш йӧрата, но шкенжым пеш простан куча: ик мут дене ойлаш гын – дипломат тудо Африкыштат дипломат.
– Мый 2001 ий 21 апрельыште Душанбе олаште шочынам, – ойла Мухаммад. – Латикымше класс марте врач лийынем ыле. Но ачамын неле пашажым ужмеке, тыгай профессийлан тунемаш шонымаш йомо. Мыланем шукыракше костюмым чияш келша, садлан дипломат гай кошташ йӧратем. Мемнан дене туныктымо рӱдер лийын. Тушто англичан, (перс, араб йылмылам школ гычак палем) немыч йылмым тунемынна.
Рвезын ойлымыж почеш, Фуджантыш ешге илаш кайымышт годым тудлан куд ий лийын. Вара тушечын Чкаловск олаш кусненыт. Аваже, Дилафруз, сурт пашам ышта, ачаже, Бахром – врач-кардиолог. Ешыште 13 икшыве (кандаш рвезе да вич ӱдыр) уло. Тудо – визымше.
– Кызыт кумшо курсышто, тӱнямбал кыл факультетыште тунемам, –ойла студент, – Умбакыже МИД-ыште пашам ышташ шонем. Эн ончыч Таджикистаныш направлений почеш каяш верештеш, вара йот элыш каяш шонымаш уло. «МОСТ»-ыш кошташ тӱҥалынам. Тушто мый Хушнут лӱман йолташ дене палыме лийынам. Тудым шке иза семын шотлем. Хушнут Йошкар-Оласе йоча-влакым хореограф семын индий куштымашлан туныкта. Тудат – таджик, студент улмыжо жапыште ик эн чолга лийын.
Теве тыге оҥайын Марий кундемыштына таджик студент-влак тунемыт. Йылмыштым, йӱлаштым ӧрдыж кундемыштат огыт йомдаре, арален илат.

М.СКОБЕЛЕВ

Опубликовать в Одноклассники

Добавить комментарий