2019 ий — театр идалык. Тидын вашеш «Марий Эл» ГТРК ден М.Шкетан лӱмеш национальный драме театр у проектым илышыш шыҥдареныт. Тудым «Микрофон ончылно театр» манын лӱмденыт.
У проект полшымо дене Марий радио «шӧртньӧ» фондыштыжо аралалтше радиоспектакль-влакым интерентыш луктеш.
— Радиом колыштшо йолташна-влак кодшо кечылаште Сергей Николаевын «Салика» радиоспектакльжым колыштын кертыныт гын, лишыл жапыште Никлай Арбанын «Кеҥеж йӱд», Сергей Чавайнын «Илыше вӱд» пьесышт почеш шындыме радиоспектакль-влакым вераҥдена, — палемдыш радиовещаний службым вуйлатыше Вячеслав Кольцов.
Палемдыман, нине спектакльлаште кумдан палыме марий артист-влакын Тимофей Григорьевын, Виктор Бурлаковын, Анастасия Страусован, Илья Россыгинын да молынат йӱкыштым колаш лиеш.
Вячеслав Анатольевичын палемдымыж почеш, идалык мучко Марий радион «шӧртньӧ» шӧрлыкшӧ гыч эше «У муро», «У саска», «Оръеҥ мелна», «Айвика», «Кунам ломбо пеледеш» да эше икмыняр тошто спектакльым тӱнямбал эҥыремышвотыш луктыт.
Икманаш, Марий радион 106 FM-ыш куснымыж дене ындыжым ончычсо радиоспектакльже-влакым Интернет гочат (www.gtrkmariel.ru), машина дене кудалме годымат колышташ лиеш.
А.Байкова.
