УВЕР ЙОГЫН

Саламлена: Марий хор Озаҥыште сеҥен

15 апрельыште Озаҥ олаште Семён Казачков лӱмеш хор конкурс-фестиваль шымше гана эртен. 

Тушто Казань, Набережные Челны, Иркутск, Москва, Ижевск, Санкт-Петербург, Тольятти, Ульяновск олала, Липецк область, Казахстан Республик, Пермь да моло кундем гыч мурышо коллектив-влак мастарлыкым ончыктеныт. Марий Эл Республикын чапшым Национальный президент искусство школын йоча хоржо (чылаже 74 икшыве) арален да «Кугурак ийготан хор» номинацийыште икымше степенян лауреат лӱм дене палемдалтын.

Марий йоча-влак «Пайрем муро» (Ю.Евдокимов), «Достойно есть» (П.Чесноков), «Уж ты сад» (руш калыкын, В.Калистратовын обработкыжо) муро-влакым йоҥгалтареныт.

— Тыгай конкурс Европышто гына эрта. А Озаҥ олаште лийме нерген палымеке, миен толашак тыршыме, — куанжым пайлыш хор вуйлатыше, Марий Эл Кугыжаныш премийын лауреатше Лилия Семёнова. — Конкурсышто жюри пеш йодмашан лийын: мурымым ното почеш, а тональностьым камертон дене терген.    

А.Байкова.

Опубликовать в Одноклассники

Добавить комментарий