Марий Элым вуйлатыше Александр Евстифеев 13 мартыште правительстве пӧртыштӧ марий межрайонный пӱртӱс аралыше прокурор Алексей Киселев дене вашлийын мутланен. Тушто пеҥгыде коммунальный шӱкшакым поген шупшыктымо да тойымо йодышым каҥашеныт.
Алексей Киселевын ойлымыж почеш, ты пашам пӱртӱсым аралыше прокуратур эреак шинча ончылно куча, тачысе кечылан кугу илемлаште сай велышкыла лийше вашалтыш шижалтеш. Кундемыште материальный негызым уэмдыме: у техникым, жаплан келшыше пластик контейнер-влакым налме. Но посна районлаште экшыкат вашлиялтеш. Мутлан, тӱлаш колтымо квитанцийлаште ак, регистрироватлыме еҥ-влакын чотышт йоҥылыш ончыкталтыт.
Рашемше чыла экшык шотыш налалтеш да кораҥдалтеш. Тылеч посна граждан-влаклан прием эртаралтеш. Тушто еҥ-влак тургыжландарыше чыла йодышым пуэн кертыт, каласен прокурор.
Вашлиймаште южо районышто шӱкшакым жапыштыже огыл шупшыктымым посна каҥашеныт. Алексей Киселевын ойлымыж почеш, южо вере шӱкшакым мешакыш поген оптат да тылзылан ик гана шупшыктат. Республикым вуйлатыше пашам тыге виктарен колтымо дене келшыдымыжым ончыктен. Прокурорын шонымыж почеш, шӱкшакым шупшыктымо шумлык услугылан раш пале стандартым ышташ кӱлеш.
Республикын правительствыштыже экологий дене кылдалтше йодышлан кугу тӱткыш ойралтеш, вет Марий Эл ик эн яндар пӱртӱсан кундемлан шотлалтеш. Тудым ончыкылык тукым-влаклан арален кодыман, палемденыт вашлиймаште.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
