Тений шыжым, 8 сентябрьыште, Марий Эл Кугыжаныш Погыныш да верысе самоуправлений органлашке депутат-влакым сайлаш тӱҥалына.
Тидлан «Единый Россий» партий ик эн чолган ямдылалтеш. Ты ганат тудо ончылгоч йӱклымашым (ПГ) эртара. Тидланак пӧлеклалтын ыле 25 февральыште Йошкар-Олаште лийше пресс-конференций.
Партийын региональный отделенийжын секретарьже, ПГ-н оргкомитетшын председательже Владимир Мухин журналист-влаклан Кугыжаныш Погын да муниципал образований-влакын представительный органласе депутатлан кандидат-влакым палемдыме радам дене палдарен. Региональный исполком вуйлатыше Александр Майоров нунын могай документым пуышаш улмышт, ПГ-шке ушнаш йодмашым чумырымо паша кузе шукталме, тыгак «ПолитСтартап» проект да тушко ушнымо правил-влак нерген каласкален.
Тений партий уым пурташ ямдылалтеш – ты гана ончылгоч йӱклымаш электрон йӧн дене лиеш. Тидлан мӧҥгӧ гычат лекташ огеш кӱл. Кӧ тыге йӱклаш шона гын, pg.er.ru. сайтыште 25 апрель гыч 24 май марте регистрироватлалт шуктышаш. Тиде йӧн дене йӱклымаш ПГ-м эртарыме единый кечын, 26 майыште, эрта.
Кандидат-влакым 24 февраль гыч 30 апрель марте темлаш лиеш. Регистраций деч вара нуно агитаций пашаш ушнат. Ончылгоч йӱклымаште сеҥыше-влак вараже депутат мандатым налшаш верч тыршаш тӱҥалыт.
Л.Камалетдинова.
