26 сентябрьыште Сеҥымашын ХХХ идалыкше лӱмеш полатыште Сад-пакчазын кечыже эртен. Коронавируслан кӧра тудо онлайн лийын. Пакчам кучышо-влак интернет гоч фото ден видеом колтеныт. Йоча-влакын шыжымсе саска ден лышташым кучылтын ыштыме кидпашашт-влак ойыртемалтше тӱсым пуртеныт. Чылажге 16 еҥ ушнен. Йошкар-Оласе инвалид-влакын «Отражение мира» ушемыштын, ветеран-влакын «Ветеран» клубыштын, «Сударушка» мурышо да куштышо ансамбльын участникше-влак ты конкурсыш эреак ушнат.
Тылын труженникше Яков Николаевич Заболотскихым поснак палемдыман. 93 ияш пӧръеҥ кызытат садым куча, мут толмашеш, тудо тазалыкшым чот эскера, ече дене коштеш. «Пӱртӱс ончер», «Пакчан мистерже» ден «Фазендын миссше» номинацийлашке пурышо паша-влакым жюри онлайн йӧн дене ончылгоч ончен гын, «Пакча чучыл» «Эко-мода», «Пӱртӱс материал гыч ыштыме кидпаша» номинацийлашке темлыме паша-влак полатын кокымшо пачашыштыже ончыкталтыныт.
«Эко-мода» конкурсыш утларакше йоча-влак ушненыт. Нуно тӱрлӧ костюмым ямдыленыт. Медведово 1-ше №-ан школ гыч Анастасия Дымован шыжылан пӧлеклалтше вургемже чылалан чот келшен. Ксения Михеевалан аваже мотор тувырым урген. Изирак-влак коклаште Мария Иванован пӱртӱс гыч ыштыме кидпашаже эн сайлан шотлалтын.
Погынышо-влак видео-проектор гоч Людмила Федоровна Лосеван сад-пакчажым онченыт. Видеом дачыште июльышто, сылне пеледыш-влак пеледалтме жапыште, войзымо. Уста сад-пакчазе 12 сорт розам, тӱрлӧ-тӱрлӧ астрым шында. Йошкар ден ужар пекин ковышта-влак койыт, теве лышташ коклашке кабачок шылын возын, ӱшыкыштӧ 54 сантиметр марте кушкын. Кияр сортшо – «Чын полковник». Пӧръеҥ-влак кокла гыч иктыже, «Мир» сад товариществе гыч Николай Федорович Бахтин, шке сад-пакчаштыже чапле кешырым куштен, тений ты вожсаскан лектышыже шукыштын начар лийын, а тудын моктанаш ситалык. Ныл радамыште эҥыжвондо кушкеш, нунын коклаште ремантандный урлыкат уло. Емыжше шолдыра, тамле, шере улмыжо видео гочат шижалтеш. Галина Павловна Рослякова «Сударушка» ансамбльыш 2005 ий годсек коштеш, шкеже Килемар район гыч, Актаюжсолаште клубым вуйлатен. Вара Йошкар-Олаш илаш куснен, 60 ияш, кызыт пенсийыште, конкурсыш ансамбльысе йолташыже-влак дене пырля толын. Тиде ансамбльым 50 ий утла вуйлатыше, Марий Эл тӱвыран сулло пашаеҥже Зоя Петровна Березина кажне ийын ты конкурсышко ушна. Садым 1992 ийыште Йошкар-Ола воктенысе Сидоровышто налын. Конкурсым иктешлымеке, сеҥышыш лектыныт: Николай Бахтин – «Пакчан мистерже», Людмила Лосева – «Фазендын миссше». Пайрем калыклан келшен, толшо-влак пакча-саскам ончен куштымо шотышто сай ой-каҥашым налын каеныт.
М.СКОБЕЛЕВ
Снимкыште: Николай Бахтин – «Пакчан мистерже», Людмила Лосева – «Фазендын миссше».
