Кодшо шуматкечын, 30 июньышто, Йошкар-Оласе «Дружба» стадион ӱмашсе семынак теният гӱжлен – ты кечын тыште республиканский «Сабантуй» пайрем эртен.
Пайремыш республикыште илыше-влак веле огыл чумыргеныт, вес кундемла гычат, поснак пошкудо Татарстан Республик гыч, уна-шамыч толыныт. Погынышо-влакым пайрем дене Марий Эл вуйлатыше Александр Евтифеевын лӱмжӧ дене республик правительстве председательын икымше алмаштышыже Сергей Сметанин саламлен. Тудо палемден: «Сабантуй» шкеж деке тӱрлӧ калыкым, тӱрлӧ культурын еҥыштым уша. Тидыже этнический, тыгак йылме, конфессий-влак кокласе чекым кораҥдаш полша.
Пайремыште почётан уна-влак коклаште Татарстан Республикын информатизаций да кыл министрын алмаштышыже Азат Мугинов, Татарстанысе Апастовский муниципал район вуйлатыше Рашид Загидуллин, Татарстан Республикын калык поэтше Роберт Минуллин, Марий Эл Республикын Мусульман-влакын региональный духовный управленийыштын муфтийже Фанус Салимгареев да Йошкар-Олан мэрже Евгений Маслов лийыныт.
«Дружба» стадионышто пайрем мурызо, спортсмен да ончышо-влакым иквереш ушен. Еҥ-влак тӱрлӧ таҥасымаште вийыштым терген кертыныт. Мутлан, нуно кирам нӧлтеныт, мешак, вӱдвара дене куржталыныт, канатым шупшыныт, шинчам петырен, шун кӧршӧкым шалатылыныт. Парашютист-влакын показательный выступленийыштым ончашат калыклан оҥай лийын.
Да, мутат уке, «Сабантуйышто» молгунамсе семынак эн тале патырым – батырым – палемденыт. Пӧлек шотеш тудлан йӱла почеш тагам кучыктеныт, палдара Марий Эл вуйлатышын организаций да аналитике виктемже.
Л. Камалетдинова
