1 август марте «Идалыкын Российысе пушеҥгыже» конкурс увертаралтын.
Конкурслан пушеҥге-влак спискым РФ субъектласе исполнтельный кучем-влакын темлыме йодмашышт почеш всероссийский программын сертификационный комиссийже пенгыдемден. Номинант-влак коклаш логалыныт: Веденский писте, Шаляпинын кожшо, Кугыжа тумо, Баварский чодыран эн кужун илышыже, Ольхонасе ошма чонга-влакын царицыже, Йӧратыше-влак отрон пунчыжӧ, Тургеневын тумыжо, Васнецовын пистыже, Граф Панинын топольжо да молат. Нуно кажныже исторический пӱртӱс раритетлан шотлалтыт да Российысе кугу ийготан пушеҥге-влакын национальный реестрышкышт пуртымо улыт. Икманаш, чыланат «Илыше пӱртӱсын памятникше» лӱмым нумалыт.
Тиде радамыште Марий Элыште, «Марий чодра» национальный паркысе Ваштар курыкышто кушшо «Пугачевын тумыжат» улеш. Тудат конкурсышто участвоватла.
«Идалыкын Российысе пушеҥгыже» – тиде «Идалыкын Европысо пушеҥгыже» тӱнямбал конкурсын ойырен налме этапше. Конкурс кажне ийын эртаралтеш. Россий тушто 2018 ий гыч участвоватла да кажне гана кум сеҥыше коклаш логалеш. 2019 ийыште Абрамцевын тумыжо 2-шо верым налын, 2018 ийыште Белгородысо тумо, 2020 ийыште Калмыкий гыч Шкет шогышо тополь, 2021 ийыште Дагестанысе Акрет платан кумшо лийыныт.
Конкурсын тӱҥ шонымашыже еҥ-влакым пӱртӱслан мелын савыраш, элнан пӱртӱс памятникышкышт савырыме кугу иготан пушеҥге-влакым аралаш кумылаҥдаш. Российысе этапыштыже сеҥышыш лекше пушеҥге кушмо регионышто вара йоча сӱрет конкурс эртаралтеш. А сеҥыше-влакын пашаштым Брюссельыште эртышашлык ончерыш колтат. Тудо конкурсым иктешлыше церемонийым эртарыме Европысо Парламентын оралтыштыже лиеш.
Марий тумылан йӱкым пуаш шонеда гын, тидым «Деревья – памятники живой природы» ссылке почеш ышташ лиеш.
С.Носова
