Тӱвыра да сымыктыш аланыште тыгай национальный премийым налшаш верч Шернур район Марисола кундемысе Купсола ял гыч иза-шольо Шабдаровмытын «Тройняшки» ансамбльыштат ушнен да финалистын сертификатшым сеҥен налын.
Алексей, Никита, Илья Шабдаровмыт калык куштымашым ончыктымышт дене кумылым савыреныт.
Тыгай премий Российысе икшыве-влакын талантан улмыштым ончыкташ йӧным пуа.
Тугеже кум йыгыр кум икшыве 2021 ий 28-30 апрельыште Москошто финалыште мастарлыкым ончыкташ тӱҥалыт. Нуно сеҥышыш лектыт да 1 майыште гала-концертыште пӱтынь эллан марий улмыштым ончыктат манын ӱшаныме шуэш.
А.БАЙКОВА
