УВЕР ЙОГЫН

Роспотребнадзор увертара: Эше ик районым карантиныш колтымо

Республикыштына ОРВИ дене черланыше-влак кечын ешаралтыт. Тидын шотышто эпидемий лондемым эше ик район вончен. 

Кодшо арнян Йошкар-Олаште, Волжскышто да Морко районышто ОРВИ да грипп шотышто карантиным увертарыме ыле. Ты гана тиде радамыш Оршанке район ушнен. Тыштат чер эпидемий лондемым 20 процентлан вончен.

Кодшо арнян Марий Элыште ОРВИ дене 4449 еҥ черланен, тидыже эпидемий лондем деч 13,8 процентлан шуко. Черланыше-влак коклаште утларакше 14 ияш марте йоча-влак улыт. Грипп дене черланыме случайым регистрироватлыме огыл.

Чер умбакыже ынже шарле манын, Морко районысо ик школышто да кок йочасадыште туныктымо да воспитатлыме пашам тӱрыснек чарен шогалтыме. Тылеч посна Йошкар-Оласе, Звенигово, Морко, Кужэҥер районласе индеш школышто 29 классым, Волжск оласе, Медведево, Морко, Оршанке, Кужэҥер, У Торъял, Юрино районласе 16 йочасадыште 21 группым карантин жаплан петырыме.

М.ИВАНОВА.

Опубликовать в Одноклассники

Добавить комментарий