Спортсмен, медшӱжар, утарыше, куштызо, ончыкылык туныктышо – чыла тиде тачысе лаштыкын унаже, Розалия Осинова, нерген. Марий Турек район 7 ялан, 14 уреман Арбор кундем Памашъялыште шочын-кушшо ӱдыр йоча годсек мер илыш деке кумылан.
– Розалия, кызыт Марий кугыжаныш университетыше шинчымашым погет. Ончыч дефектологлан тунемаш пуренат ыле, вара шонымашет вашталтын…
– Марий йылме верч чонем йӱлен. Садлан кажне тылзын Калыкле тӱвыра да тӱвыра кокласе коммуникаций институтышко куснаш йӧным кычалынам. Пиалешем вер лектын. Шочмо йылмым да сылнымутым шымлаш мылам утларак келша. Эшежым ты институтышто чылан марла кутырат. Йырваш шочмо йылме йоҥгымыжак мом шога!
– Шке калык коклаште лийме шерге, тидыж дене мыят келшем. Ты годым вес калык тӱвырамат пагален моштыман. 10-11 класслаште Татарстан кундем Ципья селасе школышто тунемынат. Тугеже одо, татар, руш-влак дене кылет пеҥгыде?
– Тыге. Ты школышто тунемше-влак шукынжо ныл йылмым палат. Урокышто рушла мутланенна гын, каныш жапыште одо-шамыч одыла кутыраш туныктеныт, татар-влак – татарла, а ме – марла.
Концертлашкат эре пырля ушнымо. Ик эн йӧратыме номерна «Дружба народов» куштымаш ыле. Тушто кажныжын ойыртемжым ончыкташ тыршенна. Тиде весела тат ӱмырешлан чоныштем кодын.
– Кушташыже тый «Арбор вел» ансамбльыште тунемынат. 2019 ийыште эртыше «Ӱдырсий» конкурсышто мастарлыкетым ончыктымо годым ты коллектив тылат полшаш толын ыле.
– Чын. «Арбор веллан» мый кугу таум каласем. Ты мероприятийлан нуно тичмаш номерым ямдыленыт. Ӱдырамаш ден пӧръеҥ-влак мурен-куштеныт, сӱан йӱла ойыртемым ончыктеныт. Ме нунын дене конкурс кечын гына вашлийынна. Сценыш лекме деч ончыч, кӱчык жапыште, мылам мом ышташ туныктеныт.
– Шукерте огыл университетыште студент-влак кокласе олимпиаде-влак эртен кайышт. Тушто тый ик вере веле огыл уш-акылет тергенат. Сеҥыше радамыш логалынат?
– Таҥасымаш-влак февраль гыч апрель марте лийыныт. Психологий, педагогике предмет-влак дене олимпиадыш институт команде дене ушнымо ыле. Кок вережат кумшо верым налынна. Тыгак мый Марий талешке кечылан пӧлеклалтше Марий йылме да сылнымут олимпиадышке ушненам. Туштыжо икымше верым пуэныт.
Ончыч школышто шинчымашем тергенам, студент радамыш ушнымекем тидын деч кораҥын омыл.
– Икымше специальностьым Йошкар-Оласе медицине колледжыште налынат.
– Тыге. Медшӱжарлан тунем лектым. Тиде профессий уто огыл. Кеч-кунамат кӱлеш лийын кертеш.
Авамын тукымыштыжо шукын врач улат, ачамын – туныктышо. А мылам тиде кок аланыштыжат шкем тергаш пӱралтын улмаш.
– Спорт туризм дене кылым кучыметлан кӧра утарыше лийынат. Тидын дене палдаре.
– Ты спорт деке 6 классыште тунеммем годым тренерем Людмила Николаевна Семенова шӱмаҥден. Тушто тӱрлылан туныктеныт: туткарыш логалше айдемым утараш, чодыра гыч лектын мошташ, тӱрлӧ шудо, пеледыш-влакым палаш, кочкаш шолташ, изирак ӱдыр-рвезе-влаклан полшаш …
Ик гана веле огыл школын, районын чапшым аралыме. Эн тале-влакым Республикысе йоча да самырык-влакын «Роза ветров» рӱдерыш колтеныт. Туштыжат ончыко лекме. Тыге республикын чапшым аралаш Саратовыш шумеш миенна. Тушто 3 вер дене палемдалтынна.
Школ деч вара ты организаций утарышылан тунем лекташ темлен. Мый келшенам. Вет тиде палымашат илышыште кӱлешан. Рӱдер дене кыл кызытат йомын огыл: таҥасымаш-влакым эртарыме годым полышкалаш йодыт.
– Розалия лӱм пеш шуэн вашлиялтеш. Тудо мом ончыкта?
– Розали – роза пеледыш гай лий.
Ковам «Роза» лӱмым пуынеже улмаш. А ачамлан Розалия келшен: «Розалия Евгеньевна – йоҥга». Ковам садак шке семынже лӱмден. Пеледыш гай мотор, саска гай чевер лийже, манын.
Марлаже Розали, татарла Рузалия маныт.
– Тау. Ончыкылык корнет волгыдо лийже.
– Тау!
О.МОШКИНА
