Россий мучко 33 кӱшыл шинчымашым пуышо тунемме тӧнеж «Опорный вуз» статусым нумалеш. Нунын коклаште — Марий кугыжаныш университетат. Тиде лӱмым вузлан 2017 ийыште пуэныт. Тунамак МарГУ «Опора Республики» премийлан конкурсым эртараш тӱҥалын.
Короновирус дене черланен кертме лӱдыкшылан кӧра черетан мероприятий икмыняр еҥым гына чумырен. Туге гынат организатор-влак видео-концертым ямдыленыт. Тудым Марий кугыжаныш университетын ВКонтактесе тӱшкаштыже ончаш лиеш. Пайремым Яна Семёнова ден Андрей Дёмин вӱденыт.
— Тений университетым 150 утла еҥ тунем пытарен. Ме таче эн тале, чолга выпускникна-влакым саламлаш погыненна. Кажныже келшыше пашам муэш манын ӱшанена. А ме нуным магистратурыш, аспирантурыш эре вучена.
Ты премийлан индеш номинаций почеш 68 ӱдыр-рвезым лукмо, — палдарыш Марий кугыжаныш университетын студент-влакым шуарен куштымо да мер калык дене кылым кучымо шотышто управлений начальникше Павел Козлов.
Лектыш почеш «Эн сай академий сеҥымаш» номинацийыште Алина Самигуллина (ФОиПО) ойыртемалтын. «Научный достоянийыште» Сарвар Азизов (ИЕНиФ) сеҥен. «Социал мобильность» номинацийыште студент кокла гыч Анстасия Казанкина (МФ), а кумшо ийготан институт гыч Людмила Мотовилова (Кумшо ийготан университетын мер советшын еҥже) палемдалтыныт. «Творческий прорывыште» Светлана Гурьянова (ФОиПО) ончыко лектын. «Таза капыште таза шўлыш» номинацийыште премийым Татьяна Парсаева (ППФ) налын. «Преподаватель-наставник» лӱмым Екатерина Флигинских (ФИЯ) ден Константин Белослудцев (ИЕНиФ) сулен налыныт.
Выпускник коклаште «Республикын э‰ертышыже» — Анатолий Смирнов (Марий Эл Республикын Кугыжаныш Погынын председательже), «Брендын адвокатше» — Константин Иванов (Тӱвыра, сывыктыш да калык паша шотышто министр).
О.МОШКИНА
