Республикыште промышленный кластерым ыштыме нерген Йошкар-Олаште лийше стратегический сессийыште каҥашеныт. Тудым Технопарк ден кластер-влакын Российысе ассоциацийышт 27 сентябрьыште Антикризисный рӱдерыште Марий Эл правительстве полшымо дене эртарен. Мероприятийыш Марий машиностроительный, «Копир», Волжский электромеханический, Красногорскысо «Электродвигатель» завод-шамычын да икмыняр моло предприятийын пашаеҥышт миеныт.
Тиде кластерыш ушнышо предприятий-влаклан Российын Промышленность да торговльо министерствыже илышыш шындарыме инвестиционный проектыштлан кучылтмо шийвундын 50 процентшым пӧртылтен кертеш. Таче кечылан министерствын реестрыштыже 38 промышленный кластер шотлалтеш, тушеч 22-шо илышыш пурталтеш. Тидлан 6,5 миллиард теҥге кучылталтеш. Тыгай кластер Мордовий, Чуваший республиклаште, Татарстаныште, Нижегородский областьыште, моло вереат уло.
Технопарк ден кластер-влакын Российысе ассоциацийыштым вуйлатыше А.Шпиленко Марий Элыште промышленный кластерым вияҥдыме тудын инвестиционный рейтингшым кӱзыкта, производствым кугемдыме дене социально-экономический могырым кушкашыже кугу шӱкалтышым ышта, у паша верым пуа манын каласен.
Л.ШАБДАРОВА.
