КУЛЬТУР ДА ИСКУССТВО

Радио сценылан кумылаҥден

Марий Эл радиошто «Аваем» муро  идалык наре жапыште моткоч чӱчкыдын йоҥга. Мутат уке, тиде мурсаска илышыште эн лишыл еҥ нерген ойлалтеш. Тудым эстраде аланыш тӱҥалтыш ошкылым ыштыше Наталья Сидоркина мура.

Наташа У Торъял районысо Кугу Лумарий ялыште шочын-кушкын. Верысе школым тунем пытарымеке, Юлсер кундемын Кӱсола ялышкыже илаш куснен.

Сценыш лекташ мо таратен? Репертуарже могайрак? Нине да моло йодышлан вашмутым материалым лудын лекмеке пален налаш лиеш.

— Наташа, сценыш изинекак лекташ тӱҥалынат?

— Тӱҥалтыш класслаште тунемме годым «Шӱшпык» ансамбльыш коштынам. Тушто ме утларакше калык семӱзгар-влакым шоктенна. Мылам совлам кыраш моткоч келша. Тыгеат тӱрлӧ семым лукташ лийме нерген лач тунам пален налынам. Шуко концертыште мастарлыкым ончыктымо, сценыш лекме дене ме, изи йоча-влак, вожылмо, лӱдмӧ койыш деч утлаш тунемынна.

А эстраде аланыш ушнаш мо кумылаҥден?

— Марий муро, сылне сем эреак кумылем нӧлттат. Икмыняр гана шкенан дене ялыште каныш касым эртарыме. Организатор пашам шке ӱмбакем налынам ыле. Касым сылнештараш мурызо-влакым ӱжынна. Володя Матеев дене мутланыме годым шкемын «Аваем» мурым колыштыктенам. Тудлан келшен. Варажым тудо Марий Эл радиошто эртаралтше «Чолпан» конкурсыш ушнаш темлыш. Кок мурем колтенам. Тиддеч вара «Калтаса сем» мурем радио гоч йоҥгаш тӱҥале. Тыге эркын-эркын репертаурым пойдараш тӱҥальым.

— Ялысе пошкудет-влак йӱкетым радио гоч колмеке, иктаж-мом ойленыт?

— Кевытыште ужалышылан пашам ыштем, сандене икте-весе дене эреак вашлияш логалеш. Сатум налаш толшо-влак тӱрлӧ нерген мутланат. Мутат уке, мурымем нерген ойлымекышт, тӱҥалтыште йошкаргаш логалын, но, калыкыште манмыла, айдеме чылалан тунем шуэш.

— Чылалан манмаште, шочмо ялет гыч вес кундемыш илаш куснымымат шотлет докан?

— Тугеат манаш лиеш. Кӱсола  ялыш школым тунем лекмеке илаш толынна. Тиде — ковамын ялже, суртшо. Ковамын илыш гыч кайымекыже, авам, изам да мый тышке илаш кусненна. Ындыжым тудат — лишыл да йӧратыме.

— Кызыт репертуарыштет мыняр мурет уло?

— «Калтаса сем», «Аваем», «Вучем шуматкечым» да молат. Лу нарыш погына. Вашке эше ик мурым ямдылен шуктышаш улам. Йӧратымаш нерген, вет самырык годым тиддеч посна илашат йокрок.

— Мурылан кӧн почеламут корнылажым ойырен налынат?

— Репертуарыштем Алевтина Баязитован, Алевтина Волкован, Вячеслав Осиповын мутыштлан возымо муро улыт. Кызыт моло-влакын почеламут сборникыштым лаштыклем: ончыкыжым профессионал семмастар-шамыч дене кылым ышташ шонем.

— Концертлашке мураш чӱчкыдын ӱжыт мо?

— Ӱмаште Марий Эл радион концертышкыже «Чолпан» конкурсын участницыже семын ӱжыныт ыле, черле лиймылан кӧра толын кертын омыл. Кызыт шуко вере ял пайрем-влак эртат, тушкат ӱжыт. Мутлан, Приволжскийыште лийынам, а рушарнян шкенан ялын пайремже лиеш. Туштат шке мурем йоҥгалтараш шонем.

Алевтина Волкова, Ольга Богачёва дене пырля Татарстан, Башкортостан республикласе, Киров кундемыште ятыр вере концерт дене лийынна. Вашлиймаш-влак оҥайын эртеныт.

— Муро  — тыланет тиде мо?

— Мурым мурен, кумылем нӧлтеш. Муро илышыште тӱрлӧ ситуаций лийме годым чоным лыпландараш, чон шижмашым палдараш полша. Сандене муро — мыланем йолташ: мӧҥгыштат, корныштат, пашаштат.

Алевтина Байкова мутланен.     

(Фотом еш альбомжо гыч налме.)  

 

Опубликовать в Одноклассники

Добавить комментарий