Марий Эл Республикын сулло журналистше
Евгений САДОВИНЛАН – 60 ий
Пагалыме Евгений Николаевич! Чапле лӱмгечыда дене саламлена да илыш рӱдым пеҥгыдын кучаш тыланена. Пеҥгыде тазалык, пашаштет у деч у сеҥымаш волгыдо эрласылан ӱшаным ыштат, тек кажне у кече шӱмышкет, ешет да родо-тукым коклашке тыныслыкым, ласкалыкым шава.
Газетым савыктымаш – тӱшка сомыл. Шукышт журналистын пашажым гына ужыт, южыштын лӱмнерыштым палат, южышт дене материалым ыштыме годым вашлийыт да сай палымышке савырнат. Но теве ответственный секретарьын, корректорын, кусарышын, вёрсткым ыштышын пашашт шинчалан койдымо, тыгодымак нунын деч посна нимогай савыктыш ош тӱняш лектын ок шу. Мемнан юбилярна, Параньга район Кугу Почиҥга ялын эргыже Евгений Николаевич Садовин, артистат лийын кертеш ыле, вет 1983-1987 ийлаште Марий кугыжаныш университетыште тунеммыж годым «Рия-рия» ансамбльыш коштын; кугыжаныш тӧра сомылымат шот-радам дене шуктен кертше; но 1987-1988 ийлаште «Призыв» Шернур райгазетыште ыштымыж годым возымо корным ойырен налын да тачысе кечынат «Марий Эл» газетнам саемдымаште, чапландарымаште тырша.
1979-1981 ийыште ВВС войскаште служитлен пӧртылшӧ, тылеч ончыч «йылмызе» специальностьым налше рвезым 1988 ийыште пӱрымаш «Ямде лий» марла йоча газет редакцийын омсажым тӱкалтен пуртен да пылышышкыже йыштак пелештен: «Тый ответсек лият».
– Ӧрмалгенам, кокытеланенам, кертам мо, шоненам, – шарналта Евгений Садовин. – Тунам газет лукмо йӧнжат весе, йӧндымӧ лийын. Но, шарнем, Виталий Сергеевич Дмитриев кумылаҥден мане: «Тый кертат!».
Пӱрымаш дене от ӱчаше, маныт. Е.Садовин 7 ий «Ямде лий» йоча газетын тӱҥ редакторжын пурла кидше лийын. Республикыште лекше марий да руш изданий-влак тунам Печать пӧртыштӧ верланеныт, журналист-влак икте-весыштым сайын паленыт, творчествыштым эскерен шогеныт. «Марий коммуна» газет редакций гыч Леонид Кудряшов икмыняр ганак шкешт деке пашашке ӱжын, ятыр жап вискалымек, Евгений Садовин 1995 ийыште кызытсе «Марий Эл» газетыш кусна, журналист Юрий Исаков дене коктын ответсек Павел Шакировын алмаштышыже лиеш. Куанен каласыман, нуно тачат журналист радамыште улыт, ала-кунам шулдыр йымакышт налме колллегыштым 1 майыште юбилей дене саламлаш тӱҥалыт.
Евгений Николаевич йӧратыме пашажлан 33 ийым пуэн, ик ий утларак «Ончыко» журналыште тыгаяк сомылым шуктен.
Ответсекын пашаже тыгае, пеҥгыдын йодаш, кунамже йӱкым кугемдаш але ӱстембалым пералташ кӱшта. Но Евгений Николаевичын тыгай койышыжо пеш шуэн палдырна. Илышыштат тудо тыгай: пушкыдо кумылан, полшаш йодшылан нигунам торешланыдыме, чылажымат вискален шонкален ыштыше.
Возымо усталыкшым жапын-жапын савыкталтше журналист материаллаште ужына. Марий сылнымутышто Евгений Садовин кусарыше семын палыме, тудо утларакше родо-тукым финн-угор калык-влак гыч лекше сылнымут мастар-влакын произведенийыштым марий лудшо деке намиен шукта. Палена, кусарыме паша куштылгыжак огыл, но марий писатель йолташыже-влак тудын мастарлыкшым кӱкшын аклат.
Чон йодмо почеш шуктымо паша деч посна илышыште тудым Людмила Вениаминовна пелашыже, оҥгырпеледыш гай кок ӱдыржӧ куандарат. Полина Марий Элыште кугыжаныш служащий пашам шукта, а Юлия, ача-ава сурт гыч торлен, Санкт-Петербургысо Петр Великий лӱмеш политехник университетыш тунемаш пурен.
Л.СЕМЕНОВА
