27 августышто, рушарнян, Йошкар-Оласе йоча стоматологий поликлиникыште 6-8 ияш ӱдыр-рвезе-влаклан «Таза пӱй» акций эртен. Тудо у тунемме ийлан пӧлеклалтын.
Акцийыш поликлиникын врачше ден оласе икшыве-влак кумылын ушненыт. Доктор-шамыч изи пациент-влакын умша кӧргыштым тергеныт, пӱйыштым фторан препарат дене обработатленыт, эрыкташ туныктеныт. Тыгак чын кочмо, кариес профилактике да умша кӧргым шотышто кучымо правилан мотор памятке-влакым пуэденыт.
Врач-влак чылаже 29 йочан умша кӧргыжым тергеныт: 6-8 ияш 13 ӱдырыным да 14 рвезыным, 3 ияш марте 2 икшывыным. 11 йочам угыч эмлалташ ӱжыныт.
Поликлиникын холлыштыжо самырык специалист-влак йоча ден ача-ава-шамычым умша кӧргӧ гигиенылан туныктеныт, тиде урокым модыш семын эртареныт. Тыгак умша кӧргӧ гигиенылан да профилактикылан пӧлеклалтше мультфильм ончыкталтын.
Акцийыш ушнышо кажне йоча поликлинике гыч умша кӧргым шотышто кучымо у шинчымаш да юж шар дене каен.
М.ИВАНОВА.
