Шоҥгемме велеш йоча пагыт утыр да утыр ушешем возеш. Эн йӧратыме пайремем У ий ыле…
Ачам ден авам сайын иленыт. Ешыште ик йоча веле лийынам, сандене нуно мыйым моткоч йӧратеныт. Но ачам ик ситыдымаш дене орланен: подылаш йӧратен. Декабрь тӱҥалтыште пашадарым налын. Мӧҥгӧ толмыж годым армийыште пырля служитлыме йолташыжым вашлийын. Нуно «Пурлмыверыш» пуреныт да шукак йӱыныт. Туштак ачамын пашадаржым луктын налыныт.
Тидын шумлык ачам ден авам кугун шургышт. Ачам вургемжым погалтыш да аваж деке – ковам деке – илаш лектын кайыш. Шылташ тӧчыш гынат, авам чот ойгырыш, а мыланем мане: «Ит шорт, ачат пӧртылеш…»
Жап эрта, У ий кечын лишемеш. Мый тунам икымше классыште тунемынам, Йӱштӧ Кугызалан ӱшаненам. У ий деч ик арня ончыч авам кожым шогалтыш. Тудым коктын сӧрастарышна. А кастене мый Йӱштӧ Кугызалан серышым возышым да кож йымак пыштышым. Тушто пӧлек деч шӧрлымем возенам да улыжат-укежат ик кумылем – ачамым пӧртылташ – йодынам.
Эрдене кож йымаке ончальым – серыш уке. Ӧрмем ужын, авам лыпландарыш: «Йӱдым, очыни, Йӱштӧ Кугыза толын…»
У ий водын омсашке ала-кӧ пералтыш. Авам тудым почаш куржын колтыш. Кенета пӧлемыш ачам пурен шогале. Ох, кузе чот куанышым! «Ачам пӧртылын!» манын, шӱйышкыжӧ кержалтым. Тудо мыйым кӱшкӧ нӧлтале, шупшале да мане: «Ӱдырем, могай чот тыйым ужмем шуын!» Вара сумкаж гыч мотор курчакым лукто да мыланем шуялтыш… Теве тудо, у ий чудо! Теве могай юзо Йӱштӧ Кугыза! Тыгай деч вара тудлан кузе от ӱшане?!.
Кушкын шумекем, авам тиде чудын «секретшым» почо: тудо серышым лудын да ачамлан наҥгаен пуэн. Ачам тунамак пӧртылаш тарванен, но авам тидым лачшымак У ий водын ышташ темлен. Тау ачам ден авамлан!..
Тудо курчакым кызытат эн шергакан арвер семын аралем. Модышым ончен, 55 ий ончычсо жапым, тудо юзо у ий йӱдым, кызытат порын шарналтем.
М.Скворцова.
Звенигово ола.
