Наследствылан шотлалтше погым ӱдыремлан кусарыме нерген документым ыштынем. Тидлан договорын могай йӧнжым ойырен налаш ом пале. Кызыт завещаний ден пӧлеклыме шотышто договор эн сайлан да йӧнанлан шотлалтыт, маныт. Тыгак нунын коклаште ойыртемат уло, ойлат. Тиде ойыртемже могай, пален налнем ыле. Эше пӧлеклыме годым пӧлекым налше еҥ доходлан налогым тӱлышаш маныт. Тиде чын мо?
С.Спиридонова.
Кужэҥер район.
Йодышлан юрист, риелтор И.Филиппова вашешта:
— Нине кок договор коклаште ойыртем чынжымак кугу. Наследствылан права тудым возышын колымыж деч вара вийыш пура, тидын деч вара веле погыжо вес еҥлан вонча. Пӧлеклыме нерген договор (дарственный) еҥын илымыж годымак ышталтеш, сандене ты пӧлекым кӧлан ыштен, тудыжо договореш кидым пыштымекак озаш савырна.
Завещанийым уэш-пачаш вашталтен возаш лиеш, а дарственныйым шонымо семын вашталташ ок лий. Туге гынат наследствыште шке ужашлан правам тыланда йӧршеш вучыдымо еҥ-влак, мутлан, тора родо-тукым еҥ-шамыч, йодын кертыт. Тунам завещанийыште ончыктымо лишыл еҥда-шамычым нунын дене кужу жап судитлалт толашыме азап вуча. Ты йодыш пешак пӱсын шога гын, тунам илыме годымак дарственный манме йӧным ойырен налаш сайрак. Тыге веле тендан сугыньлен кодымыда тӱрыс шукталтеш манын ӱшанаш лиеш.
Кусараш лийдыме погым пӧлеклыме годым пӧлек доходлан шотлалтеш, сандене тудым налше еҥ физический лица семын погын акше гыч 13 процент налогым тӱлышаш. Но тыштат ойыртем уло. Пӧлекым пуышо да тудым налше ик еш гыч улыт але лишыл еҥлан шотлалтыт гын, кусараш лийдыме погым пӧлеклымылан кӧра налме доходлан налогым тӱлыман огыл. Тыгай еҥлан шотлалтыт: вате ден марий, ача-ава ден йоча-влак, тидын шотыштак ончаш налме йоча ден икшывым ончаш налше-влак, коча, кова да уныка-шамыч, ешысе ик ача але ик ава деч шочшо иза ден ака, шольо ден шӱжар-влак.
А.АНДРЕЕВ ямдылен.
