УВЕР ЙОГЫН

Пытартыш оҥгыр пайрем дене саламлен

25 майыште Марий Элым вуйлатыше Александр Евстифеев школым тунемын пытарыше-влакым пытартыш оҥгыр пайрем дене саламлен. Ты кечын тудо Советский район Ургаш поселкысо  лицей-интернатыште  торжественный линейкыште  почетан уна лийын.

Тений тушто 48 еҥ лицейым тунемын пытара. Александр Евстифеев ӱдыр-рвезе-влакым  саламлен да экзамен-влакым сайын кучаш тыланен.

Марий Элым вуйлатыше ешарен: те, рвезе-влак, кызыт пеш кугу вашталтыш лийшаш жапыште иледа, те лишыл жапыште пӱтынь илышдам рашемдыше ошкылым ыштышаш улыда. Тудым келгын шоналтен ыштыман, каласен уна.

Александр Евстифеев лицеист-влакын  да поселкысо образовательный учрежденийын шумо сеҥымашыштым ушештарен: лицей 2012 ий годсек «Российысе эн сай школ-влак» да «Российысе эн сай ялысе школ-влак» федеральный рейтинглаште  ончыл радамыш лектеш. 2015 ийыште «Ялысе эн сай школ — 2015» Всероссийский конкурсышто лауреатын дипломжо дене палемдалтын. Тунемше-влаклан  сай специализацийым – медицине ден военно-патриотический направлениян специализацийым – ойырен налме.

Лицейыште кадет классым тунемын лекше 113 рвезе кызыт кӱшыл военный учебный заведенийлаште  тунемеш але Россий Вооруженный Вий радамыште офицер  семын служитла. Химико-биологический  класслаште тунемше-шамыч медицине вузлаште шинчымашыштым пойдарат. Нунын кокла гыч шукышт мӧҥгӧ пєртылыт да республикысе  медучрежденийлаште  пашам ыштат, палемден Марий Элым вуйлатыше.

 Пытартышлан Александр Евстифеев выпускник-влаклан чыла пашаштышт сеҥымашым, тазалыкым да пиалым тыланен. А нунышт чыла экзаменым сайын кучаш,  ойырен налме вузлашке тунемаш пураш, тунем лекмек, шочмо кундемыш пєртылаш да  Марий Элым  чапландараш сєреныт.

Марий Эл Республикым  вуйлатышын организаций да аналитике виктемжын  уверже негызеш П.Шакиров ямдылен 

Д.Речкинын фотожо.

Опубликовать в Одноклассники

Добавить комментарий