Уремыште 24 май. Йырваш олмапу, сирень, вишне пеледалтыт. Садерыште шӱшпык муралта. Каваште кече шыратен онча. Лач выпускник-влакын суртыштышт тургыжланыме кумыл шижалтеш. Нуно пытартыш йынгырлан ямдылалтыт.
Медведево район Руш Кукмарий школышто тунемше Яна Пушкинат тиде кечын эрден эрак кынелын. Теве тувыр дене ош фартукшым шымарта, гольфшым шкаф гыч луктеш, туфльыжым эрыкта. Аважат йырже пӧрдеш. Кужу, мотор ӱпшым шереш, бантикшым пижыктен пуа. Тыгодым ӱдыржым ончал-ончал колта, шинчалукыштыжо шинчавӱдшат койылалта. Шижалтеш, тудо тургыжлана. Икшывыжын кушкын шумыжлан ок ӱшане.
Яна воштончышыш ончалеш, шке йырже пӧрдын савырна, туфльыжым чия да, аважым шӱргӧ начкашкыже шупшалын, школыш вашка. Икмыняр жап гыч выпускницын Ирина аваж ден Алексей ачажат почешыже тарванат. Суртоза пеленже видеокамерымат налын. Тыгай кугу пайремым войзен кодыде нигузе ок лий.
Ача-аван школ кудывечыш толын шумекышт, 11-ше класс (вич ӱдыр да ик рвезе) тошкалтышыште рад дене шогалын шуктен. Янат –нунын коклаште. Пала, вашке тудлан шочмо школжо, йолташыже, туныктышыжо-шамыч дене чеверласаш логалеш. Садлан шӱлыкан улмыжо коеш. Но тиде шӱлык жаплан гына, вет тудо школыш пӧртылаш шона. Ик жап гыч шкежат тунемшыже верч тургыжланаш тӱҥалеш. Молан манаш гын ӱдыр туныктышылан тунемаш пурынеже. Тугеже шонымашыже шукталтше манын тыланена.
Мутым директор Александр Леонтьевич Иванов нале. Тудо чылашт дене марла саламлалте да выпускник-влакым пытартыш йынгыр пайрем дене саламлыш, экзаменым сайын кучаш да кумда илыш корнышто лӱдде ошкылаш, шке шонымашке шуаш тыланыш. Ойлымыж годым кажне йочам шке икшывыж семынак йӧратымыже шижалте.
Варажым выпускник-шамычын икымше туныктышышт В.Ельсукова, класс вуйлатышышт М.Винокурова, икымше классыште тунемше-влак ятыр поро шомакым каласышт. Нунат шӱмыш логалше почеламутым лудыч, шӱлыкан мурымат йоҥгалтарышт. Тыгодым шкеныштынат, ача-аван, туныктышын кумылышт тодылалте. Шукын шинчавӱдым кучен ышт керт.
Мучашлан выпускник-влак, шонымашышт шукталтше манын, тӱрлӧ тӱсан шарым южыш колтышт. Но пайрем мучашлалтын огыл. Ача-ава-шамыч ӱдыр-эргыштлан тамле тортым кучыктеныт. Тиде сий йыр чумырген, нуно пайрем сортам пуал йӧртышт да шкаланышт сайым тыланышт. А пытартыш йыҥгырым нунылан 11-ше классыште тунемше Даниил Мишин ден 1-ше класс гыч Оля Катькова йоҥгалтарышт. «Йоча пагытем, кидем рӱзалтен чеверласем…» – шӱлыкынрак пелештышт теҥгечысе тунемше-влак.
Лидия ШАБДАРОВА.
М.Скобелевын фотожо.
