ПАТЫРЛЫК

Пырля погынымаш куандарен, ӱшаным пуэн

Шукерте огыл Крымыште профессионал огыл, тазалык, капкыл дене начаррак вияҥше спортсмен-влак коклаште эртыше «Пара-Крым» всероссийский культурно-спортивный фестивальыште Марий Эл гычат команде вийжым терген да икмынярышт призёр радамыш логалыныт.

Мероприятийым инвалид-влакын всероссийский ушемышт эртара. Тушко кумда элнан тӱрлӧ кундемже гыч инвалид-влак чумыргеныт. Кундемна гыч вич еҥ миен: Александр Ермаков, Евгений Данилов, Ольга Пасеева, Владимир Таникеев, Виталий Курзенёв.

Стартыш Российын 67 регионжо гыч 500 наре спортсмен лектын. Нунын коклаште 120 еҥже – коляске дене.

Марий Турек район гыч Александр Ермаков икымше гана тыгай таҥасымашке ушнен да вигак призёр радамыш логалын. Тудо коляске дене 400 метрым  эртымаште кумшо верым налын. Тыгак ӱстембал теннис дене модмаште да дартсыште  кок ший медальын озаже лийыныт. Тиде Шернур район гыч Евгений Данилов ден Медведево район гыч Виталий Курзенёв. Моло-влак медаль деч посна кодыныт гынат, нунылан шке капкыллан келшен толшо спортын видыштыже вийым тергымат ончыкылык сеҥымашлан ӱшаным пуэн, вет тушто шуко оҥай конкурс, мастер-класс, экскурсий эртаралтыныт. Тидат шуко жаплан поро шарнымашым коден.

– Мый тыгай таҥасымаште икымше гана веле огыл лийынам. Моткоч келшен. Тушто кажне спортсмен-инвалидлан шкенжым терген ончаш йӧн пуалтын. Фестиваль годым шуко оҥай мастер-класс эртаралтын. Тыште раш умыленна: кумылет уло гын, ыштен моштыдымо пашажат уке улмаш. Чылажат айдеме, тудын койышыж дене кылдалтын, – манеш Шернур районышто инвалид-влакын верысе мер организацийжын вуйлатышыже, «Пара-Крым» таҥасымашын участникше Владимир Таникеев. – Чот шонет гын, чылажымат ыштет. Мемнан ушемыште шотлалтше Евгений Даниловым поснак мокталтыман. Ӱстембал теннис дене модмаште кокымшо верым сеҥен налын. Теннис дене модмаште южыштым ончет, да шинчавӱдат лектеш. Мутлан, ик участникын кок кидшыге уке, пулыш воктене икмыняр парня гай уло да чыла. Туге гынат ракеткым тыгай пеҥгыдын кучен, талын модын, тудым иктат сеҥен кертын огыл. Тыгай годым патырлыкшылан, чытышыжлан физически таза айдеме кӧранен кертеш. Вӱдыштӧ иймашат тургыжланаш таратен. Иктым коляске дене кондышт. Тудын кидшат, йолжат уке, а вӱдыштӧ чылт кол семын иеш… Ончет да айдемын вий-куатшылан єрат. Тыршымыж дене ыштен кертдымым ыштен моштымыжлан куанаш гына кодеш. Мемнан командын вуйлатышыже Наталья Богомоловалан тау. Тудо мыланна эртаралтше мероприятий нерген эреак жапыштыже шижтара, ӱжеш, мо кӱлешым умылтара, полша. Теве тиде фестивальыш миен толмаштат надырже нимучашдыме.  

В.Таникеев шкеже ӱстембал теннис дене Шернур районын, Марий Элын, Российын чемпионжо. Жапше годым (25 ияш) аварийыш логалын, пел йол деч посна кодын. Туге гынат самырык рвезе илышлан ӱшаным йомдарен огыл. Кеч-могай пашалан кыртмен пижын, шонымашкыже шуын: ешымат чумырен, пелашыж дене кок икшывым йол ӱмбаке шогалтеныт. Шкенжын ойлымыж почеш, вуйым сакаш огыл, умбакыже, чын корным ойырен, пеҥгыде лияш ача-аваже, родо-тукымжо, йолташыже-влак, физкультур да спорт дене пеҥгыде кылым кучымо полшеныт, но тидын да Шернур районысо инвалид-влакын ушемышт нерген изиш варарак посна материалым лудаш темлена.

Участник-влак «Пара-Крым» таҥасымашке моткоч тале спортсмен-влакын чумыргымыштым палемденыт. Фестиваль сай кӱкшытыштє эртен. Мутат уке, кажныже шке тазалыкше дене кылдалтше спортын тиде але тудо видыштыже вийжым терген.

Тушто мемнан спортсмен-влак шкештат мастер-классыш ушненыт. Мутлан, Шернур районынак шочшыжо Ольга Пасеева, шкеже колясочник гынат, инструкторын полышыж дене парашют дене тӧрштен. Тыге ӱдырын шукерте шонен коштмо шонымашыже шукталтын. Участник-шамыч скалодромышто лийыныт, пикш дене лӱйылтыныт. Тыгак нунылан парус спорт, парадайвинг, фридайвинг дене палыме лияш йӧн пуалтын. Тушкат кумылын спортсмен ушнен кертын. Тыге ты тӱшкаш пурышо-влак икте-весым ужын, икте-весе дене палыме лийын,  ончыкылык волгыдо илышлан ӱшаным шочыктат, обществыште шкештым моло дене тӧр кучаш тунемыт.

Марий Элыште адаптивный спортлан кугу тӱткышым ойырат. Ушештараш уто огыл: тений кеҥежым, 12-21 июльышто, Марий Элыште Инвалид-влакын III всероссийский кеҥеж спартакиадышт лийын. Тудо «Стремись вперёд, стирая грани!» ўжмаш дене эртаралтын.

– Паралимпийский таҥасымаш, модмаш пўтынь обществылан, калыкын уш-акылжылан тӱняончалтышым сай велыш вашталташ моткоч кугу шӱкалтышым ышта. Паралимпиец-влакын пеҥгыдылыкышт молымат пеҥгыде койыш-шоктышан лияш тарата, кажнынам у вий-куат дене пойдара. Тыге сеҥымашлан, илышлан ӱшан лектеш, – манын спартакиаде деч ончыч Россий президент В.Путин. Марий Эл вуйлатыше тудын саламлымашыжым, тыланымашыжым Спартакиадын участникше-влаклан ушештарен.

Е.ЭШКИНИНА.

Снимкылаште: Шернур районышто инвалид-влакын верысе мер организацийжын вуйлатышыже, «Пара-Крым» таҥасымашын участникше Владимир Таникеев сеҥымашышт дене палдара.

Авторын фотожо.

    

Опубликовать в Одноклассники

Добавить комментарий