Пошкырт Республикысе рӱдӧ Марий юмыйӱла ушем увертара.
27 пеледышын (июньышто) Калтаса районысо Актуган ялын шнуй курыкыштыжо Шукын Курык кугызалан вуйым савымаш лиеш.
Тиде верыш калык шке семынже эре коштын. Пагытын тӱрлӧ шӧрыныштыжо тудо марий-влаклан вийым да сай илышлан ӱшаным пуэн шоген. Ӱмаште, шыжым, ял калык тиде верым уэш почын да вес ийлан пурлык дене кумалтышым эртараш сӧрен коден.
«Чумбылат курыкышко Курык кугызалан кумалаш ятыр ий коштына, а шкенан дене Курык кугызалан кумалме верна уке. Тудым ышташ да вуйым савен кумалаш ятыр шонен коштмо. Теве ынде шонымашна шукталтеш. Кумалтышна кум пурлык дене эрташ тӱҥалеш. Тӱрлӧ кундемлаште илыше марий-влакым пагален ӱжына. Ушныза кумалтышыш, пырля лийына — виян лийына», – ойла Пошкырт кундемын тӱҥ онаеҥже Геннадий Пастиев.
Ончыктен кодыман, Пошкырт велне тений кеҥежым эше ныл вере кумалаш лектыт: Янаул район Комбыялыште (18 июнь), Калтаса район У Оръямучаште, Дӧртылӧ район Миядыкыште (20 июнь) да Калтаса районыш Кӱшыл Качмаште (21 июнь).
С.Носова
Снимкыште: Г.Пастиев
Авторын фотожо.
